La LOMCE: Contrarreforma educativa

SUATEA somete a analís la (pen)última reforma na Educación

5 de payares de 2012 DE 2012 • Glayiu

El gobiernu del PP, col altivu Wert a la cabeza de Educación, decidió nun hacer un nueva llei, sinón modificar l’actual LOE. Wert, que pasará a la historia como’l ministru que más fexo recular la Educación dende’l golpe d’estáu de Franco, sigue falando ensin ponese coloráu de “pautu d’Estáu” pola educación.

UNA VUELTA AL PASÁU...
UNA LLEI SEGREGADORA...
UNA LLEI ESCONTRA LOS DERECHOS LLABORALES DEL PROFESORÁU…

El gobiernu quier que la contrarreforma tea aprobada p’abril-mayu de 2013, pa que’l MEC y les comunidaes autónomes puedan desendolcala nel cursu 2013-2014 y
llantala pal otru. Pero pesie a que tendrían tiempu abondo pal so desendolcu anantes
del cursu de la so implantación efectiva nos centros el gobiernu nun quier debate cola
comunidá educativa.

JPEG - 5 KB

Y como amuesa clara de la so negativa a negociar topámonos con que’l trámite nel Conseyu Escolar del Estáu fáise aina: la fecha de la sesión plenaria ye del 30 d’ochobre de 2012, depués de lo cualo la mayoría absoluta del PP puede aprobar la nueva Llei Orgánica nel Congresu y nel Senáu en mui pocu tiempu.
Hasta agora, el testu nun se negoció con naide, a nun ser coles organizaciones de la
derecha más reaccionaria y/o coles patronales de la enseñanza privada. SUATEA, y
los STES-i yá diximos lo que pensábemos al rodiu de los datos que diba apurriendo’l
Ministeriu y tamién les nuestres consideraciones sobre sos les intenciones en dos ocasiones: una delantre’l ministru y tol so equipu y la otra delantre la secretaria d’Estáu d’Educación, que desplicó les llínies xenerales de la so propuesta na Comisión Permanente del Conseyu Escolar del Estáu. Negociación, lo que se diz negociación, nun la hubo, y pensamos que nun va habela, pues la so mayoría absoluta y la soberbia del ministru faennos temer que desprecien los calces de participación democrática. L’anteproyectu nun s’acompaña d’una “memoria económica”, elementu imprescindible dao que cuantifica’l costu de la so aplicación, anque prestábanos saber cuánto va costar facer millones d’evaluaciones per parte d’empreses privaes, tanto al alumnáu como al profesoráu. No que cinca al preámbulu, cenciellamente negámonos a analizalu, pues ye más propiu d’un tertulianu ilustráu que d’una esposición de motivos d’una llei orgánica d’educación, anque suelta ideoloxía neolliberal mecía con principios maurientos de la dómina franquista.
Axuntamos asina una riestra de notes crítiques que quieren informar al profesoráu y a la comunidá educativa sobre lo que se mos vien enriba en casu de qu’esta llei llegue a ponese.

9 RAZONES PA OPONESE A ESTI DISPARATE

1.- UNA CONTRARREFORMA IDEOLÓXICA
L’anteproyectu tien una gran carga ideológica neolliberal conservadora, como amuesa en diferentes propuestes, ente les que destacamos la elevación a Llei orgánica
de la financiación pública de los centros qu’estremen al alumnáu en función del so
sexu (esto fáenlo anguaño centros d’ideoloxía relixosa ultraconservadora), l’esanicie
de los conteníos d’Educación pa la Ciudadanía qu’amosaben la rialidá y pluralidá de
la nuestra sociedá y la desapaición de Ciencies pal Mundu Contemporáneu, onde
s’impartía una cultura científica mínima, imprescindible p’atalantar el mundu actual,
pa tol alumnáu de Bachilleratu. La derecha más reaccionaria del Estáu ta parcialmente contenta. El trámite parlamentariu de la LOMCE pue ser el momento nel que los sectores más conservadores del PP metan midíes tovía más regresives y privatizadoras en temes como la financiación de los centros y la situación del enseñu de la relixón.

2.- REVÁLIDES Y SEGREGACIÓN: UNA CARRERA D’ESTORBISES FECHA PA CONDERGAR AL FRACASU A LES FÍES Y FÍOS DE LA CLASE TRABAYADORA
Meter les reválides (5 pruebas esternes: en 3º y 6º de Primaria, en 3º y 4º d’ESO
y n’acabando’l Bachilleratu) y de la segregación del alumnáu dende 1º d’ESO son dos de les midíes que más dañu van facer al sistema educativu y al alumnáu. Depués de les reválides de 3º y de 6º de primaria, con calter “orientador” pa los centros y les families, pue dase un fechu insólitu: a los 11 ó 12 años, depués de facer primero de
la ESO ensin algamar los oxetivos del curso, a un rapazu o una rapaza puen catalogalu yá como inservible pa siguir los estudios y empobinalu a una vía que nun tien vuelta p’atrás, hacia la esclusión pa siempre. La FP inicial pretende derivar a los qu’escaparen a esa primer peñera hacia unes enseñances de nome FP pero que torguen depués la continuidá de los sos estudios en FP de grau mediu. Por nun falar de la FP superior o de los Bachilleratos N’acabando 2º d’ESO, y si prepasa les torgues anteriores, l’alumnáu deberá escoyer ún de los itinerarios zarraos que deriven, o pa FP, o pal Bachilleratu. En 3º d’ESO, depués d’otra reválida que pieslla’l ciclu de tres cursos, dase una nueva esbilla irreversible que s’afita en cuartu, cursu que se convierte nun propedéuticu al preparar exclusivamente bien pal bachilleratu bien pa la FP.

3.- EL NEGOCIU DE LA EVALUACIÓN A COSTA DE LES PENALIDAES DEL ALUMNÁU Y DE LA INFRAVALORACIÓN DEL TRABAYU DEL PROFESORÁU
El despreciu al profesoráu del enseñu públicu qu’esta Llei tiñe amuésase, ente otres coses, nel afitamientu de les yá citaes reválides a facer por axentes esternos, esto ye, por empreses privaes que van sacer enormes beneficios: contratos millonarios pa sustituyir el llabor docente y la evaluación continua. Porque la evaluación, sigún la LOMCE, yá nun ye un preséu pa meyorar la calidá del enseñu, sinón pa peñerar al
alumnáu y a los centros, nuna suerte de rankings fechos de forma “llegal”. Les reválides en secundaria van ser conditio sine qua non p’algamar el títulu de graduáu
n’ESO: esto ye, tol llabor fechu pol profesoráu al traviés de la evaluación continua
elimínase de primeres, y quien va dar el placet ye una empresa privada que desconoz
al alumnáu y que va tener como únicu oxetivu rendir cuentes y sacar beneficiu económicu. El títulu de graduáu n’ESO y les sos reválides namás van sirvir p’acceder
a la FP o al Bachilleratu. Los que vaigan pal mundu llaboral ensin casi formación, y
polo tanto seyan los más maleables y susceptibles de ser meyor esplotaos, nin siquier
tendrán llegao hasta equí, derivaos hacia los programes de FP inicial y a los
programes de refuerzu y meyora del deprendimientu y el rendimiento. Si teniendo
fecho la reválida pa FP quixeren facer bachilleratu, (la “vía académica”) habrán facer la otra reválida (la “vía aplicada”), y viceversa.
Nel casu de la reválida de 2º de Bachillerato, que sustitúi a la PAU, ta claramente empobinada a favorecer a los centros privaos, que tienen unos resultaos na PAU en forma inferiores davezu a los de la pública. Esaniciar una prueba común nun pue otro
que favorecer a les empreses privaes y al so alumnáu. La rialización de diches pruebes nes que’l profesoráu va actuar como convidáu de piedra -¿quiciabes en xunetu?-, va facese fuera del calandariu llectivu ordinariu, colo que van aumentar los 175 díis llectivos.

4.-OXETIVOS Y COMPETENCIES BÁSIQUES
La LOE introdució’l conceptu de competencies básiques como gran novedá. Esti tipu d’enfoque pedagóxicu persigue esclusivamente sustituyir los saberes que se veníen
enseñando por simples competencies, esto ye, por elementos susceptibles de ser
cuntaos, midíos y de ser tabulaos de manera que podian acabar acreditándose individualmente.
Asina, nel futuru un patrón que necesite un perfil concretu de trabayador, podrá saber per una Skills card, una tarxeta onde s’acrediten les competencies de ca ún. Cola desapaición de los convenios colectivos que s’avecina, la negociación individual de les condiciones llaborales ta servida. La desapaición de la referencia a los oxetivos como parte del currículum y la importancia que se-yos da a les competencies, tamién tien por oxetu llantar sistemes como’l venceyamientu de los xornales del profesoráu colos rendimientos del alumnáu, como se ta promoviendo n’otros países como Estaos Uníos y como yá s’empecipió n’Asturies y n’Andalucía cola evaluación docente y el venceyamientu de los xornales al algame d’oxetivos de centru cuantificables y medibles. Y esta ye una incongruencia d’esti anteproyectu: los oxetivos nun formen parte del currículum y, sicasí, siguen existiendo pa ca una de les etapes educatives, como figuraben na LOE, que sí los incluyía como parte del currículum.

5.-EL DIRECTOR COMO XERENTE Y XEFE DE PERSONAL OMNIPOTENTE
El director (asina, en masculín, en tola LOMCE) conviértese en xerente y xefe de personal al modu empresarial y en tolos aspectos. El profesoráu y, en xeneral, el Conseyu Escolar pierden pesu na elección del director o directora, que queda dafechu en manes de l’Alministración educativa. Suprímese la primacía del profesoráu del centru qu’opta a la dirección del mesmu.
Alcordémonos de que cola desapaición de la mayoría de les competencies de los conseyos escolares la dirección fáise col control absolutu de la marcha’l centru. Los Conseyos Escolares pierden peso en toa triba de decisiones, que pasen agora a manes del director. Podrá conformar el Claustro como-y pete: pue esbillar al profesoráu interín que trabaye nel so centru, elixéndolu d’ente toles persones que tean nes llistes d’interinos, y arreblagando per tolos criterios d’antigüed. y demás méritos, como hasta agora. El profesoráu definitivu tamién va vese afectáu pola mesma midida, yá que’l director (sic) pue configurar el so claustru col profesoráu que meyor s’afaye al proyectu específicu de centru, lo que supondría tresllaos forciaos col envís de que lleguen otres persones peñeraes pol director. Alcordémonos de los centros podrán especializase y asina va ser más cenciello desprendese de docentes que nun s’“afayen” al nuevu perfil. El director participará na evaluación de los docentes del so centru: si dalgún elementu-y abulta incómodu, nun tien más qu’evalualu negativamente yá que por necesidaes de l’alministración a esi docente podrá treslladáselu de forma forciada a cualisquier llugar de la CCAA.

6.-DESPIDOS Y TRESLLAOS FORCIAOS: LA RECONVERSIÓN DEL PROFESORÁU
Esti anteproyectu dinamita los derechos del profesoráu y fai españar años de llucha pa meyorar les condiciones llaborales del profesoráu. La reducción de materies, la desapaición d’opciones pal alumnáu en casi tolos cursos de secundaria y bachilleratu, la eliminación del bachilleratu d’Artes, Música y Danza, y l’esanicie d’optatives y materies de modalidá, van suponer una reconversión brutal del profesoráu. Si a esto-y añadimos la xuba del horariu llectivo del profesoráu, asina como la del númberu d’alumnos por aula que se ta aplicando yá como consecuencia del decretu Wert, topámonos con que’l númberu de docentes de los que se quiera prescindir nun faga otro qu’aumentar de forma esponencial.
Los intentos d’esmantelar el sistema públicu d’enseñanza necesiten un marcu llegal y esta Llei yelo: a los despidos de profesoráu interín, añadiráse que la esbilla de quien queden trabayando fadráse de forma discrecional, ensin respetu dalu polos méritos como antigüed. o la posición nes llistes; el profesoráu funcionariu de carrera podrá perder el so puestu de trabayu y ser treslladáu de forma forciada nel casu de que quede ensin horariu o bien nel caso de que, a xuiciu del director (sic) no tenga les “característiques necesaries” pal tipu de centru que’l director quiera. Esto yá se ta faciendo en delles CC.AA., onde la sida de los centros billingües úsase pa contratar profesoráu “nativu” anglófonu o onde pásase del concursu de tresllaos pa cubrir les places. Meter la FP DUAL, amás de xenerar mano d’obra de baldre pa les empreses –si ye que queden- va suponer la supresión de bona parte del profesoráu de FP, yá que la estancia del alumnáu nestes empreses – que pue llegar al 70% del tiempu d’estudiufáise a costa de la so formación achuquinando bona parte de la carga llectiva de los ciclos formativos

7.-RANKINGS Y CLASIFICACIONES DE CENTROS
L’oxetivu de la Llei Wert, amás de retayar, despedir y poner al profesoráu so la bota d’una dirección omnipotente, ye’l de favorecer al enseñu priváu y priváu concertáu. El mecanismu pa ello ye la ellaboración de rankings, de clasificaciones de los centros basaes nos resultaos del alumnáu. Como l’alumnáu de los centros privaos peñérase per aciu de les cuotes “voluntaries” y empobinando pa los centros públicos al alumnáu con problemes de cualisquier triba, y dao que’l sistema educativu de nuevuvieyu alcuñu que va conllevar esta Llei básase n’enseñar pa pasar les pruebes estandarizaes basaes nes competencies básiques, una y bona depauperada la escuela pública y aumentaos los conciertos a la privada, nun quedará otra que publicar los probes resultaos de la pública p’animar a la concesión de nuevos conciertos y encamentar la fuxida hacia’l sector priváu. ¡Y agora los rankings publicaránse obligatoriamente por mandáu d’esta Llei! La publicación de rankings d’escueles y alumnáu, en función de los resultaos algamaos, ta en rellación estrencha colos mecanismos de los que van a depender tanto los xornales de los docentes como los fondos que reciba cada centru educativu. Les consecuencies son terribles pal enseñu públicu: oblígase a los centros, al profesoráu y al alumnáu a estudiar p’aprobar los exámenes esternos y a recibir fondos en función de los resultaos algamaos (“eficiencia na asignación de recursos públicos”). Ehí ta la referencia a la “rendición de cuentes” que ye otru de los nuevos principios del sistema educativu xunta la “tresparencia” (lléase publicación de resultaos d’alumnáu y escueles). A naide se-y escapa qu’apurrir más fondos a les escueles que meyores resultaos saquen nes reválides va llevar a la miseria a les escueles onde se concentre mayor númberu d’alumnáu con problemes. Esto ye, la educación pierde’l so calter compensador de les desigualdaes. Nos USA esti tipu de polítiques educatives tán trayendo como consecuencia’l pieslle d’escueles públiques pa ser entregaes a empreses privaes, depués de despedir al profesoráu que nun saca “bonos resultaos” nestes pruebes.

8.-PRIVATIZACIÓN: NUEVES Y VIEYES FÓRMULES
Los centros privaos podrán peñerar tovía más al alumnáu cola “especialización” y metiendo “aspectos específicos” pa la definición del “calter singular del centru”, y van facelo con actividaes y asignatures que l’alumnáu deberá pagar, faciendo una peñera con criterios económicos. La Llei Wert afita amás la segregación cola estensión de los conciertos educativos. La garantía de conciertos a los centros privaos que segreguen al alumnáu en función del so sexu amuesa enforma cuála ye la prioridá d’esti gobiernu: ampliar los conciertos, devaluando y desfinanciando a la escuela pública.
La LOMCE pretende rozar el camín pa nueves formas de privatización del sistema educativu, como la que pue desendolcase nes Escueles Oficiales d’Idiomes, onde al so profesoráu ábrese-y la puerta de los IES. Nun ye asina a la inversa, como podría ser el casu si interesara la permeabilidad ente los dos tipos d’enseñu. Pue ser la forma de “llibrase” del profesoráu d’esti cuerpu cuando se consume la privatización.

9.- ASIGNATURES, CARGA HORARIA Y PROFESORÁU
Ente les propuestas de modificación que tien l’anteproyectu destaquen tamién les referentes a les asignatures que van dase nos diferentes cursos, afectando gravemente a les plantiyes de los Institutos. Hasta que nun se publiquen los decretos que desendolquen esta llei, d’aprobase, no va poder sabese a ciencia cierta cuánta carga horaria pierde o gana cada Departamentu. Pero esto nun impide qu’agora podamos facer un primer averamientu críticu a cómo plantega’l MEC esta situación. En Primaria quieren aumentar l’horariu de les materies instrumentales, colo que baxaría la carga horaria del restu y peligraríen puestos de trabayu de profesoráu especialista en materies como Música y Educación Física. La Tecnoloxía y la Plástica ven reducida la so presencia na ESO, y la primera pasaría a dase nun cursu solu, frente a los dos actuales. La Ética de 4º desapaez y yá nun hai alternatives al pensamientu éticu de calter católicu. Lo mesmo pasa cola optativa de Cultura Clásica. P’acabar, desapaez la modalidá entera de Bachilleratu d’Artes Escéniques (que pasa a ser parte de la FP), y desapaecen asignatures como Diseñu, Electrotecnia y Tecnoloxía Industrial