La izquierda asturiana reclamó «soberanía y cambiu social»

9 de setiembre de 2013 DE 2013 • Glayiu

Dellos cientos de persones caleyaron pel centru Xixón reclamando «soberanía y cambiu social» nel día d’Asturies, convocaes pola izquierda asturianista Conceyu Abiertu, Compromisu por Asturies, Andecha Astur y Izquierda Anticapitalista, col sofitu de la Corriente Sindical d’Izquierda, del centru social La Semiente, la organización xuvenil Darréu y la Xunta Estudiantil Asturiana.

JPEG - 116.5 KB

Dende Compromisu afirmaron que «diferentes fuerces sociales punxímonos a trabayar en comuña p’amosar qu’hai una Asturies que nun se resigna, frente a un gobiernu que’l Día la Nación namás qu’organiza actos festivos, escaeciendo los problemes del país
y les nueses reivindicaciones como asturianes y asturianos».
La marcha partió a les 12:30 de la Plazuela San Miguel pa finalizar nel Náutico, onde los convocantes lleeron un comunicáu.

La Corriente Sindical d’Izquierda atalantó que «Los partíos políticos de la Xunta Xeneral y la mayoría los partíos del Parllamentu español nun ficieron otra cosa qu’espoliar Asturies y tornala nuna especie de colonia de la qu’estraer recursos naturales, enerxía eléctrica, mano d’obra barata o, simplemente, el dineru fácil d’una corrupción cada vez más escandalosa. Mientres tantu, les asturianes y asturianos quedamos condenaes y condenaos al paru, la miseria o la emigración.
Pela so parte, les direiciones de los sindicatos mayoritarios, CCOO y UXT, acabaron por tornase nuna pieza más d’esta maquinaria. Les y los trabayadores d’Asturies nun tenemos nin una sola institución que nos defienda. La clas obrera asturiana nun puede seguir delegando el so futuru nestos xestores del mesmu sistema capitalista que nos ta espoliando».

DOCUMENTOS