La izquierda soberanista reivindica el 25 de mayu

22 de mayu de 2013 DE 2013 • Glayiu

Una concentración a la una del mediudía delantre la Xunta Xeneral de Principáu servirá pa que les dos principales organizaciones de la izquierda soberanista remembren de manera conjunta los fechos del 25 de mayu de 1808. Naquella xornada hubo un llevantamientu popular n’Asturies, que se declaró soberana pa lluchar escontra les tropes invasores franceses. Compromisu por Asturies, en pallabres del so responsable de comunicación, Tino Fernández, quier recupera "una fecha capital na hestoria de la Asturies que resiste a la inxusticia”, mientres que Conceyu Abiertu atalanta que "los fechos de 1808 son de los más rellevantes de la nuesa hestoria, y al mesmu tiempu un espeyu nel que miranos anguaño". La organización xuvenil Darréu tamién se sumó a la convocatoria.
El día enantes nacerá la Xunta Estudiantil Asturiana, la que pretende ser organización de referencia pal alumnáu "feminista, ecoloxista, antifacista, soberanista y crítico". L’actu fundacional tendrá llugar a les 18:00 hores nel Edificiu históricu de la Universidá d’Uviéu.

JPEG - 121.4 KB

Hai movimientos nel espectru políticu de la izquierda soberanista asturiana. El prósimu día 24 tendrá llugar la Xunta Nacional Constituyente de la que pretende ser la organización referencial de los universitarios asturianos, la Xunta Estudiantil Asturiana. A les 18:00 hores nel Edificiu históricu de la Universidá d’Uviéu va cellebrase baxo’l lema "Ye la hora de la mocedá d’Asturies" l’actu fundacional d’una organización que pretende atropar a los estudiantes "críticos, antifacistes, ecoloxistes, feministes, soberanistes y rebeldes", en pallabres de los convocantes.

Al día siguiente, sábadu 25 a la una del mediudía, Compromisu por Asturies, Conceyu Abiertu y Darréu entamen una convocatoria conxunta delantre la Xunta Xeneral del Principáu pa conmemorar el llevantamientu popular de 1808 escontra l’invasor napoleónicu. "Esti fechu tien dos vertientes que merecen rescamplar; per una parte l’afirmación efectiva de la capacidá de decisión soberana de Asturies, esto ye, d’un exemplu d’autodetermín, y por otra de resistencia popular ante la inxusticia, lo que supon un exemplu importante y un precedente que tien de ser recordáu nel contestu económico y social nel que s’atopa Asturies, y que comparten bona parte de los pueblos de la nuesa redolada; los ataques a los derechos sociales y a les conquistes históriques, ante lo que non cabe más qu’una respuesta en clavede resistencia", diz Tino Fernández, voceru de Compromisu, que reivindica "qu’el 25 de mayu s’incorpore al calendariu festivu asturianu como un día nel que se conmemora l’enfotu de llibertá y resistencia de los asturianos y asturianes y que se recupere Sala Capitular, sede de la Xunta Xeneral nel momentu, como un llugar simbólicu d’afirmación de la identidá del país".

JPEG - 70.6 KB

Mariu Arbesú, voceru de Conceyu Abiertu, atalanta que "Los episodios de rebeldía más importantes na hestoria del pueblu asturianu vienen davezu acompañaos pola proclamación de la nuesa soberanía, y nestos tiempos, nos que vemos como imprescindible una fonda tresformación política, económica, social, mediuambiental, etc, vindicamos la soberanía como parte imprescindible de dicha tresformación". El coordinador del movimientu social soberanista considera que "énte l’escaezu y maltratu institucional que sufre esta fecha y los sos fechos por parte’l gobiernu asturianu, dende Conceyu Abiertu llamamos a participar na iniciativa #AsturiesResiste, consistente nuna concentración énte la Xunta Xeneral de magar les 13:00 del sábadu 25 de Mayu, pa remembrar y vindicar los valores de rebeldía, soberanía y dignidá del pueblu asturianu".

Ye la segunda vegada que les dos organizaciones soberanistes faen una convocatoria conxunta dende que se crearan, polo que paez que daqué se mueve na izquierda asturiana.