La desobediencia multidireicional

18 de febreru de 2013 DE 2013 • Pablo M. Testa

Les víes talantaes p’algamar un mundiu meyor -dichu cuasi de forma romántica-, les espuestes fasta’l momentu, tienen trés aspeutos fundamentales. La vía llegal (pues ta acordies cola llei “x”), la vía allegal (aquélla que nun tresgrede denguna llei pues nun se recueyen les actuaciones producíes), y la vía illegal (aquélla que tresgrede de dalguna forma’l sistema llegal imperante).

N’ocasiones asgaya, estes trés víes nun son puestes a comuña. Nun se conxuguen, y amás, los partidarios y partidaries d’una o otra, finen por arrequexar les demás por un ciertu purismu que na práutica amosó ser deficiente ya ineficaz. Como en too, paez que lo heteroxéneo fina por apaecer como solución interesante a tener en consideranza. Nacho Muñiz, nun artículu d’esta páxina, yá lo camentaba, asina como lo esplicitaba Rafa Palacios tamién; y en xeneral veo que vamos, con matices, toos y toes col mesmu enfotu y el mesmu envís. Conxugar lo llegal, allegal ya illegal pue fortalecer, en delles ocasiones, la propia llucha. Lo illegal y allegal, polo xeneral, creyarán les alternatives (magar qu’haiga espacios de llegalidá au se puean dar ciertes formes, llamémosles, orixinales); demientres que les aiciones y ciertos preseos llegales, podrán (talantaos de bones maneres), fortalecer la propia idega.

Ye dicir, por exemplu, que les actividaes “sociales” que se faen nun centru social lliberáu, nun puen ser talantaes como xúnicamente posibles endientro d’estos espacios, yá qu’una vegada éstos seyan desaloxaos, de selo, les actividaes y texíu creyáu desapaeceríen. Asina, y pongo a maxiname, que l’usu d’espacios sociales, vecinales, organizativos, como llares de sindicatos (escluyo como sindicatos, pues nun me lo paecen, primordialmente a UXT y USO), asociaciones de vecinos, o coleutivos sociales con sé llegal, puen favorecer a que les otres actividaes, dinámiques, etc., qu’en forma son illegales, puean caltenese nel tiempu pesie a un ataque de los aparatos de poder que nesi sen actuaren.

Agora que ta tan de moda la famosa “desobediencia civil”, ¿por qué nun-y esiximos al gobiernu asturianu que faiga desobediencia civil? ¿Por qué nun-y esiximos a los socesivos gobiernos asturianos que llexislen en virtú lo que nagüen les sos persones (obviando, si se ve que ye perxudicial pa los intereses del Pueblu Asturianu, les midíes ordenaes pol central), magar que tean recurriendo a una posible desarticulación les nueses competencies?

Quinxere facer, entós, una posa na caleya pa talantar esto mesmo, pero ximelgándolo dica los espacios nidios de poder, nel nuesu casu, La Xunta Xeneral d’Asturies. En xineru viaxé pa Xixón y falando con ún de los mios primos, entrugaba-y yo de qué forma’l gobiernu asturianu podía ñegase aplicar les midíes mandaes pol central, y áu taben les llendes. Retrucóme con un exemplu: “Nuna reunión qu’hebo ente les Comunidaes Autónomes y el gobiernu central pa la comunicación de la LOMCE, les comunidaes de Catalunya, Euskadi, Asturies, Canarias y Andalucía, salieron de la mesma desaprebándola.” Y entós, viendo que nun se me retrucaba a lo que daveres taba entrugando, torné facer la entruga, obteniendo, esta vegada, como contestación: “Nun se pue oponer el gobiernu asturianu a les midíes ordenaes pol central, namái dexar constancia de la so desaprebación. El riesgu ye perder les competencies alxudicaes a la Comunidá Autónoma”. ¡Ablucante! Agora bien, ¿Nun vos resulta curioso nun poder tomar, causi, decisiones (yá que’l central te solliña unes que tiés de cumplir -nun pudiendo nesti sen dicir un res-), por llerza a perder les competencies? ¿Nun mos tamos ñegando, precisamente, l’exercer les competencies, les que seyan, escudándonos en perdeles? ¿Nun ye absurda esta llóxica?

Agora que ta tan de moda la famosa “desobediencia civil”, ¿por qué nun-y esiximos al gobiernu asturianu que faiga desobediencia civil? ¿Por qué nun-y esiximos a los socesivos gobiernos asturianos que llexislen en virtú lo que nagüen les sos persones (obviando, si se ve que ye perxudicial pa los intereses del Pueblu Asturianu, les midíes ordenaes pol central), magar que tean recurriendo a una posible desarticulación les nueses competencies? A la fin de cuentes, de facto, nun les tenemos, pues a la fin tenemos de recular si’l gobiernu central mos diz qu’a callar, qu’esto se fai asina.

Si ellos faen l’ordena y mando, nós, na nuesa llóxica la resistencia deberíemos FACER; facer con toles sos lletres. Nun yá amosar les nueses ñegatives o desaprebaciones, que tamién, sinón ñeganos a cumpliles si nun les vemos coherentes; llexislar y axeitar Asturies. Ésa ye la xúnica manera pa facer esplícita la nuesa disconformidá, les ganes de camudar les coses, les ganes d’axeitanos d’otra forma, les ganes de vivir... Sicasí, dubio, fonderamente, que’l PSOE faiga esi tipu polítiques.