Javier Cubero: "Vivimos una crisis total de llexitimidá institucional como la de 1910"

9 de mayu de 2013 DE 2013 • Glayiu

Javier Cubero, historiador y politólogu, presenta una ponencia sobre ún de los escasos cartafueyos de teoría política del rexonalismu astur. La Doctrina Asturianista, de 1918 ye una obra na que la burguesía de la primera restauración borbónica espresaba les sos apetencies autonomistes.

La Doctrina Asturianista ye fía del so tiempo, ¿en qué contextu históricu surde esti documentu programáticu?
El modelu políticu de la primera restauración borbónica taba afitáu nun modelu mui centralista d’Estáu, con unos déficits democráticos totales. Dábase un modelu de frecuentes pucherazos elleutorales, encardarmaes por redes clientelares venceyaes a los partíos estatales: el Lliberal conservador de Cánovas del Castillo y el Lliberal fusionista de Sagasta, que se diben turnando nel poder de manera pactada.

¿El casu d’Asturies yera diferente al panorama políticu del restu del Estáu?
Yera un exemplu más del clientelismu y el caciquismu; sicasí, n’Asturies nun hai equilibrio ente los dos partíos, hai un claru dominiu del conservador, llideráu por Pidal y Mon. A la muerte d’esti, la rede clientelar del partíu conservador entama a dixebrase, apaeciendo con fuerza el Partíu Reformista de Melquiades Álvarez.
Nesi contestu espublicen en 1918 la Doctrina Asturianista.

¿Qué ye lo destacable d’esti documentu?
La Doctrina Asturianista espublizóse cuando la Junta Regionalista tenía dos años de vida y taba nel so meyor momentu. Ye obra de tres persones: Álvaro Fernández de Miranda, Ceferino Alonso Fernández y José González. Destaca porque ye ún de los documentos con mayor radicalidá na afirmación política de la identidá propia. L’otru ye la Constitución Asturiana que formularon los republicanos federales nel añu 1883. Tienen una fondura na so afirmación de la personalidá colectiva d’Asturies. Ideolóxicamente nun llega a dar el saltu al nivel de nacionalismu porque nun ruempe’l cordón umbilical del mitu cuadonguista. Caltiénse dientro de les llendes del cuadonguismu hexemónicu. Na sociedá asturiana d’entós ta dándose una ferviella rexonalista ante la crisis de llexitimidá del modelu de turnu y vez de los dos partíos y de la corona. Dase una organización política a tres niveles: per un lláu, la mancomunidá d’ayuntamientos mineros, pela manzorga, iniciativa del PSOE y del SOMA; depués ta Liga Pro-Asturias, remanada por Alas Pumariño y que respuende fundamentalmente a un intentu d’una parte de la oligarquía autóctona de canalizar pal so porgüeyu la dinámica rexonalista; per últimu ta la Junta Regionalista del Principado (promotora de La Doctrina Asturianista), el movimientu que precisamente desata esa ferviella rexonalista de magar l’añu 1916. Entre la Junta y los otros dos movimientos dase una diferencia bien granible, porque los dos primeros nun diben acullá d’una tímida descentralización alministrativa y polítiques proteccionistes pal sector del carbón, en crisis por mor de la competencia del carbón inglés.

¿Cómo ye que la burguesía asturiana enxamás tuvo aspiraciones soberanistes o nacionalistes?
La burguesía asturiana ta percómoda nel bloque oligárquicu español. Ye mui poco dinámica, mui conservadora, y con tendencia al rentismu. Mentantu’l poder central-yos pusiera al so serviciu a la Guardia Civil pa reprimir al movimiento obreru, nun había problema nengún. Namás s’alcordaben d’ínfules autonomistes cuando veíen pelligrar los sos intereses empresariales venceyaos al carbón. Cuando cambia’l contestu, nos años 1920, tanto la burguesía asturiana o el mesmu SOMA van colaborar cola dictadura de Primo de Rivera. Otra cuestión ye al Junta Regionalista, que sí que plantega cuestiones culturales ya identitaries como la normalización de l’asturianu, dándo-y una proyección de futuru más alla de la concepción arcaizante. Tamién fizo una revisión en clave fuerista de les instituciones tradicionales asturianes, entiende que la Junta General del Principado yera una estatalidad dientro de la monarquía española, y plantega al mesmu tiempo un modelu económicu pa la Facienda asturiana asemeyau al de los territorios vascos. Pero como nun rompen el cordón umbilical del cuadonguismu queden nun rexonalismu mui radicalizáu. Al mesmu tiempo que se reivindca como mui asturianu, reivindícase como español. Sicasí, ye lo más avanzáu nos planteamientos identitarios asturianos.

¿A qué se debió la curtia vida de la Junta Regionalista?
A partir de 1919 entama el so declive. Paga’l preciu de nun ser un partíu políticu; yera más bien una platafroma de sectores de la derecha católica enfrentada al réxime central d’una u otra manera, por ser carlistes o individuos desplazaos del Partíu Conservador, xunto a sectores nuevos na escena política. Too esto desanició a los pocos años pol cambiu del panorama políticu que se dio a nivel estatal. L’interés actual nesta obra ye’l de ser una de les primeres obres del asturianismu prenacionalista. La rellación col momentu políticu d’anguaño ye que podemos dicir que tamos nuna segunda restauración borbónica con un modelu centralista de bipartidismu de turnu y vez, que sufre una crisis total de lexitimidá asemeyada a la d’aquellos años de 1910