Invertir en belicismu lo que se retaya en solidaridá, non al Festival Aéreu

26 de xunetu de 2013 DE 2013 • Glayiu

Distintes persones, partios políticos, organizaciones y movimientos sociales asturianos protesten, un añu más, frente a los actos del Festival Aéreu de Xixón resaltando’l calter pro-belicista, asína como l’ingente espilfarru de recursos de les arques públiques nun momentu en que los retayos en servicios sociales son más qu’esmolecedores.

Dende la Coordinadora Asturiana de Ongd faen un llamamientu a asistir esti domingu día 28 de Xunetu a les 10:00 hores, nos Xardinos de la Reina de Xixón, onde diversos colectivos y persones darán cita p’amosar la so repulsa a los actos del Festival Aéreu, sofitaos pol monologuista asturianu, Carlos Alba "Cellero" que va acompañar les acciones informativu y reivindicativu, con una parodia del Festival na que se van poner en tela de xuiciu los principios sobre los que s’asientan esti tipu d’acciones, que promueven valores de violencia, despreciu pola vida humana ya inversión irresponsable de medios públicos.

Y tachen de vergonzosu que nel contestu de crisis económica nel que se nos pide a la ciudadanía faer un esfuerzu y por ello retáyase’l presupuestu pa prestaciones básiques, servicios públicos o cooperación al desenvolvimientu. Mentanto’l gastu n’investigación militar y el caltenimientu del exércitu sigue siendo bien cimeru al gastu n’educación, servicios sociales, alministración pública (funcionariado) y pensiones.

Dende Compromisu por Xixón destaquen que “los mesmos responsables políticos
que dicen que nun hai recursos pa l’Ayuda d’Emerxencia Social o pa programes de solidaridá internacional, rompiendo’l compromisu del 0,7% pa cooperación, impórtanoslos gastar el dineru de los contribuyentes en sofitar al exércitu español, porque los festivales aéreos pa nada precisen cuntar cola participación de militares” asina “los mesmos qu’inverten en belicismu, retayen en solidaridá”. Y llamen a la ciudadanía a participar na concentración convocada contra’l Festival Aéreu de Xixón.