Fusión de conceyos: l’ataque definitivu

17 de avientu de 2012 DE 2012 • Xosé A. González

Dende qu’españó esta crisis capitalista nel Estáu español y s’agravó ainda más con ésta la crisis permanente que vive’l nuesu país, Asturies. Llevamos bien de tiempu sintiendo falar a políticos, sindicalistes y tamién ciudadanos de la posibilidá de fusionar conceyos, desaniciar mancomunidaes o unificar servicios públicos. Hai una idea xeneral de desllocalizar y globalizar les coses en pro d’un supuestu aforru y d’una supuesta eficiencia potencial.

El maltar surdío dende’l Pueblu colo que llamen dende los mass-media como “clas política”, los reiteraos llamaos a l’austeridá y la inoperancia de dalgunos servicios son el caldu de cultivu d’esti tipu de posicionamientos. ¿Pero estes iniciatives s’afiten no anteriormente comentáu o hai dalgo más allá? ¿Hai cuestiones ideolóxiques detrás?

Asturies cunta n’actualidá con 78 conceyos y 18 mancomunidaes estructuraes. Los 78 conceyos nun se tienen por qué correspuender a la realidá nacional asturiana, partiendo de la bas de qu’hai conceyos que tan fuera de l’alministración asturiana onde hai un fondu sentimientu de pertenencia al nuesu país y per otru llau hai una serie d’ámbitos territoriales que quieren conformar un conceyu propiu, como ye’l casu hestóricu de Llugones. Ciertamente, la estensión xeográfica y demográfica de los conceyos asturianos ye bien peculiar, yá que se trata d’unos conceyos pergrandes en cuantes a estes dos variables si facemos una comparanza seria y posada colos municipios del restu l’Estáu español.

Como dicía, determinaos ámbitos sociopolíticos, comunicativos y sindicales empobinaron dende hai unos años a nivel estatal y nacional midíes nesti sen, pel momentu ensín muncha práutica. Un sector radical son los defensores de desaniciar les Comunidaes Autónomes y recentralizar l’Estáu español de forma pura y dura, tornando al centralismu del franquismu. Esi tipu de plantegamientos nun hai que descuidalos pol so peligru, pero entá tienen pocu sofitu de la xente y tan, pel momentu, lloñe de ser más que la ilusión de cuatro tardo-franquistes. Toi falando de grupos mediáticos como Intereconomía y otros canales o medios d’ultradrecha. Pero tamién tenemos a los y les señores d’UPyD, con plantegamientos iguales, anque munches vegaes na canalización del so discursu nun falen d’esta idea n’abertal.

Per otru llau, y equí ta’l principal peligru anguañu, tan los partidarios de fusionar conceyos y crear nes autonomíes macro-municipios partiendo d’esi amiestu de conceyos. Esta opción cada día ta más en boca y son munchos los ámbitos que reclamen actuaciones nesti sen, les más de les vegaes, renegando de qu’estes fusiones vayan acompañaes de idees de recentralización del Reinu d’España. El supuestu parasitismu, la duplicidá de servicios públicos o’l númberu de trabayadores municipales de cada conceyu son los principales argumentos. Pero nun hai más ciegu que’l que nun quier ver y hai que falar d’otres coses a colación d’estes propuestes.

Nesti sen, otra vuelta sal el nome d’UPyD. Esti partíu reaccionario punxo como condición pa ser llave de gobiernu, depués d’algamar un diputáu na Xunta Xeneral, gracies a La Nueva España, la fusión de conceyos. Finalmente’l PSOE fixo qu’estos sofitaren igual a Javier Fernández arrenunciando al tema de la fusión de conceyos, pero l’alderique yá ta xeneráu na sociedá asturiano y UpyD nun escuende les sos intenciones de llevar alantre esta idea cueste lo que cueste. Amás el PSOE ya Izquierda Unida, que son los partíos que xunto UpyD remanen anguaño Asturies, nun creo que seyan grandes defensores de los conceyos asturianos, yá que lleven tola vida amosando colos fechos un xacobinismu, centralismu ya inclusive españolismu como pocos.

Fai unos meses dende Madrí Rajoy y la so banda de criminales tresmitieron a la opinión pública la intención de desaniciar les mancomunidaes y too ello depués d’esborriar del mapa el 30% del númberu de conceyalíes nos municipios del Estáu

Y miren que casualidá. Nes anteriores selmanes, les xuntes comarcales d’UXT y CCOO nel Valle’l Nalón, sindicatos averaos a PSOE ya IU respeutivamente, insisten en fusionar los conceyos d’esti valle asturianu no que sedría un solo Ayuntamientu. Hai una insistencia absoluta dende estes centrales sindicales nel Valle’l Nalón en fusionar tolos municipios d’esta cuenca minera. Nun voi insistir muncho en dicir qu’estos sindicatos, anque se supón que tienen sensibilidá en cuestiones identitaries y determináu federalismu, son igual de centraliegos que partíos como’l PSOE o IU. Esti posicionamientu coincide con otros que federaciones o xuntes comarcales d’estos sindicatos burocratizaos fixeron n’otres partes del Estáu Español.

Hai que dicir que toes estes intenciones vienen empobinaes por distintes sensibilidaes, eso si, siempre dientru d’esi statu quo español y neolliberal o claudicante col neolliberalismu. Pa rematar, l’Estáu Español plantegó entamar una reforma de les alministraciones llocales. Fai unos meses dende Madrí Rajoy y la so banda de criminales tresmitieron a la opinión pública la intención de desaniciar les mancomunidaes y too ello depués d’esborriar del mapa el 30% del númberu de conceyalíes nos municipios del Estáu. Agora se supón que los conceyos podrán decidir, ver veremos, el númberu de puestos de conceyales. Esti ye’l panorama que tenemos. Con esto quieren que combayemos.

Son idees mui complementaries toes estes qu’acabo d’esponer y que tienen enfotos comunes: alloñar la política y la “democracia” de les mases, recentralizar l’estáu y caltener l’orde vixente con un retrocesu democráticu ensín precedentes. Entren agora nesti asuntu intereses políticos, económicos, ideolóxicos y corporativos. La cosa mete mieu al pánicu, sí.

Énte esti panorama ¿qué podemos dicir?. En primer llugar, atalanto qu’hai muncha xente de la izquierda alternativa n’Asturies a favor de fusionar conceyos. La rede clientelar de la FSA fai que muncha xente, quemada con esi partíu-empresa, pueda sofitar determinos que-yos quiten privilexos, en principiu, a los señores de Javierín Fernández. Pero lo ciertu ye que’l PSOE nun pierde un res. ¿Qué puede perder la FSA-PSOE en la Cuenca’l Nalón si fusionen los cinco conceyos? Imaxinen, tendríemos un partíu, un sindicatu dominante y un alcalde sofitando los mesmos intereses. Quiciabes los alcaldes que vayan a perder el so puestu nun tean muncha gana de que-yos quiten esi puestu, si, pero’l PSOE de Javier Fernández y la Federación Socialista Asturiana tan a favor dexuru. Nun-yos esmolez un res qu’esta idea vaya medrando, tien de presta-yos pola vida afitar ainda más el so poder nun ñeru propiu, como ye’l Valle’l Nalón.

Tenemos qu’esterrar la posibilidá de puxar poles fusiones de conceyos d’Asturies na izquierda d’esti país. Nun vamos ganar naide que tea nel espectru políticu alternativu y coherente. Esto namás que va alloñar la institución municipales de los intereses del pueblu y va a afitar ainda más el bipartidismu (PSOE-PP) y les sos marques blanques (FORO-IU).

Nesti sen, hemos de tener nidio que la fusión de conceyos, cuando sal de partíos de calter ultradrechista, como UpyD, y sal de partíos y sindicatos que lleven remanando la vida social de los asturianos depués de décades de llexitimación del orde burgués y español vixente, nun puede traer nada bono pa les clases populares, como tolo que tan avezaos a facer. Nun podemos esperar a que los intereses de los mesmos de siempre nun tean detrás d’esto, nun podemos baxar la guardia por qu’hai evidencies, munches evidencies.

Hemos puxar, güei más que nunca, polos nuesos conceyos asturianos. Los conceyos asturianos son parte de la nuesa identidá. Conformen la nuesa identidá como vecinos y vecines de los nuesos pueblos y afiten na xente un sentimientu identitariu de pertenencia mui sanu y prestosu, sacantes llocalismos cada vegada más esborriaos del mapa. Pero nun queda ehí namás el tema. Los conceyos asturianos son la estructura que vertebra la nuesa nación dende hai munchos años, son los pegoyos sobre los que s’afita’l país asturiano, cola so pluralidá y la so cadarma organizativa propia. Desaniciar agora los conceyos sedría como facer por desaniciar bona parte de la nuesa cultura tradicional o desaniciar l’idioma d’Asturies. Arrenunciar a los conceyos ye arrenunciar a una parte clave de la nuesa identidá como pueblu estremáu nel mundu. Munchos y munches, nun tendrán gran sensibilidá colo que toi acabante d’esponer y nun se si-yos importará muncho. Son llibres de tener la so visión, pero si arrenuncien d’ello tarán asimilando al empar el nacionalismu más reacionariu, esencialista, arcaicu y chovinista: l’español.

Per otru llau, como yá dexe ver enantes, arrenunciar a los nuesos conceyos ye tragar ainda más nel procesu de esmantelamientu de drechos fundamentales que tamos viviendo. El conceyu ye la institución política que más cerca tien el vecín d’un conceyu, xunto la colación o parroquia. Pues bien, faciendo conceyos o municipios monstruosos, como se vien plantegando, namás que va servir pa alloñar al ciudadanu más de la política, yá seya esta municipal, nacional, estatal o internacional.

Facer conceyos más grandes, tanto no demográficu como no xeográficu, nun val pa otra cosa qu’alloñar la Casa Conceyu de la xente, ye pura llóxica. Pensemos en cualesquier problema vecinal que demanden resolver los vecinos nun gran conceyu, onde l’alcalde nun se sabe nin onde vive o nun conceyu pequeñu, onde tol mundu conoz a la persona que lleva l’alcaldía y puede presionar meyor a esa persona.

Esta ofensiva ye un recorte en toa regla a la democracia, la llibertá y los drechos de les clases populares. Unes clases populares mui quemaes y que, o bien yá pasen de siguir la política, suponiendo esto un golpe definitivu, o bien escueyen alternatives polítiques populares y braeramente tresformadores. Claro, la fusión valdría p’alloñar a los partíos y organizaciones polítiques asturianes y de clase de la institución conceyil. Sedría mui dificil, cola fusión y la supresión de conceyalíes, qu’opciones alternatives a los de siempre algamaran daqué nos conceyos. Sedría una muria mui alta la qu’afitaríen a la unidá popular y a la democracia participativa y popular nos nuesos conceyos. Ye un golpe mui duru a alternatives nueves y que quieran facer les coses dende la base y d’otra manera distinta a la partitocracia del espectáculo.

Nun seyamos inocentes. El retrocesu “democráticu” que tamos viviendo nun ye un mensaxe panfletariu que dalgunes persones empleguen pa mancar al PP o los de la FSA. Ye una realidá qu’amás ta mui viva y va siguir alantre. Namás hai de salir un pocu a la cai. Y tampocu seyamos inocentes aislando esta propuesta de fusionar conceyos d’esti retrocesu de los drechos y llibertaes algamaos pol Pueblu Trabayador con muncho sangre y sacrificiu. Nun ye casualidá que surda agora, nesta dómina de conflictividá y progresiva radicalización del orde vixente, onde’l populismu y el pseudo-facismu tornen pela puerte grande. Asimilar propuestes d’esta natura ye perder lo pocu que tenemos, tornar a tiempos mui escuros y alloñar pa siempre una salida coleutiva, digna y tresformadora a esti orde de les coses.

Pola nuesa identidá como vecinos y como país tenemos que defender los conceyos. Polos nuesos drechos fundamentales y pola posibilidá d’algamar escenarios que posibiliten una tresformación social y nacional de verdá hai que defender los conceyos. Pola viabilidá socioeconómica tenemos que puxar polos conceyos d’esti país. Pol progresu social, la democracia popular y participativa y el futuru d’Asturies hai que defender con muncho enfotu y fuercia el conceyu asturianu. Hai soluciones muncho más afayaices pa los intereses de les y los trabayadores asturianos qu’esta midía. Ye l’ataque definitivu: recuperemos la dignidá, puxemos polos conceyos, faigamos conceyu, faigamos país y construyamos clase.