Fuelga de 24 hores nel tren de carril d’Arcelor Xixón

4 de xunu de 2014 DE 2014 • Glayiu

El pasáu xueves 29 de mayu, cellebróse una asamblea xeneral del tren de carril d’Arcelor-Xixón con dos hores de paru, desixendo la retirada de la sanción de 21 díes d’empléu y sueldu al delegáu sindical de la CSI nel comité d’empresa d’Arcelor-Xixón. Y decidiose por unanimidá convocar 24 hores de fuelga pa mañana xueves 5 de xunu.

Esi día cellebraráse una nueva asamblea xeneral del tren de carril, pa tratar, non yá de la retirada la sanción, sinón tamién de los problemes que sufren los trabayadores del tren.

Los fechos fueron que la direición d’Arcelor sancionó con 21 díes d’emplegu y sueldu al delegáu sindical de la Corriente Sindical d’Izquierda nel Comité d’Empresa de Xixón. El so “delitu” foi realmente grave: dar la cara pa defender los derechos llaborales de los y les trabayadores d’Arcelor. Denunciando los abusos empresariales, los retayos salariales, defendiendo’l repartu’l trabayu, la fin de les hores extres, los descansos llaborales, les nueves contrataciones, etc.