Frente xunitariu de resistencia obrera

25 de xineru de 2014 DE 2014 • Glayiu

Na mañana del 23 de xineru celebróse una rueda de prensa na fábrica d’amortiguadores Tenneco en Xixón. Los trabayadores despidíos que permanecen zarraos na fábrica, tán impulsando un procesu de confluencia ente toles empreses en conflictu y trabayadores afectaos pol paru y la precariedá.

Representantes de más d’una docena d’empreses con despidos y/o en conflictos llaborales abiertos axuntaronse na fábrica pa impulsar esti frente común. El denominador común de los discursos foi la necesidá d’unión de la clase trabayadora ante les agresiones que dexen a la xente na cai, condergaos a la precariedá, los desahucios, róben-y la salú y l’educación... Nenguna empresa ye capaz d’iguar el conflictu llaboral y social nel que tamos somorguiaos por sigo sola.

Na rueda prensa tuvieron presentes voceros de los y les trabayadores d’empreses como Tenneco, Benito Sistemes, Caxastur, Fundición Nodular, intoxicaos por mercuriu n’AZSA, Cocines Asturianes, Cébrano, Mataderu Central, Subcontrates Mineres, Coca-Cola, despidíos de la Fábrica d’Armes o Llavandería de Cabueñes, ente otres.

Ensin atacar a nengún sindicatu nin partíu, dexaron claro que les fórmules emplegaes hasta agora pa poner frenu a la sangría llaboral nun sirvieron. D’ende que plantegen un frente común dende embaxo qu’impulse la participación directa de el trabayadores como afectaos directos de les polítiques neolliberales, les reformes y los retayos.

Ensin dala dulda tratóse d’un eventu de caláu, que punxo los pelos de punta a los asistentes y que podría convertise nel entamu d’un movimientu xunitariu que visibilice y combata percima de les sigles sindicales y polítiques los graves ataques que tamos sufriendo el trabayadores.

Los asistentes cerraron la rueda de presnsa entonando al unísonu’l yá clásicu "¡Asturies sálvase lluchando!" qu’esta vegada algamó un tinte más esperanzador.