"Frente a la #Cleptocracia #Compromisuéticu"

Compromisu por Asturies presenta una campaña contra la corrupción y pola tresparencia nos cargos públicos

17 de marzu de 2013 DE 2013 • Glayiu

Compromisu por Asturies presenta una campaña pola tresparencia nos cargos públicos y contra la corrupción, onde los protagonistes son los representantes municipales de la coalición. "Desinteresase pola política ye permitir que mos roben la cartera. Hai qu’amuesar les diferencies ente ellos y quienes trabayamos de manera llimpia y sincera pol nuestru conceyu ", afirmen dende la coalición.

Como primera midida la coalición d’izquierdes espubliza los ingresos del so conceyal nel Ayuntamientu de Carreño, Roberto Holgado, pa depués facer lo propio col restu de cargos electos de la formación.

"#CLEPTOCRACIA ye la denuncia que facemos dende Compromisu por Asturies d’un sistema políticu infectáu pola avaricia y el clientelismu. Les persones, y partíos políticos que los sostienen y protexen, róbennos gracies a una política qu’en cuenta de tar al serviciu de la mayoría social, del pueblu, conviértese les más de les veces nuna máquina implacable de transferir perres y recursos de lo público a lo privao. Róbennos con descaru y a plena lluz del día, segures y seguros de que tienen derechu a ello por ser quien son", afirmen dende la organización asturianista.

Esi hastag, #CLEPTOCRACIA, tamién significa pa Compromisu "el robu de la propia política. Ye culpa d’esa #CLEPTOCRACIA la degradación constante de la percepción que tien la sociedá de la política. Aquellos y aquelles que viven d’esti sistema cleptocráticu son los primeros que quieren que nun reclamemos la política como dalgo nuestro, responsabilidá de toos y derechu de toos, porque ye la meyor manera de que puedan siguir faciendo de la cosa pública la so quintana particular. Poro, quieren desinteresate de la política, robate la cartera y qu’eso nun t’importe, y que pienses que la política ye namás cosa d’elles y ellos".

Roberto Holgado, conceyal de Compromisu en Carreño, desplícanos la postura del so grupu municipal no tocante a la representación pública: "Al entamu d’esta lexislatura Compromisu por Carreño propunxo y aprobóse alrodiu de l’asignación económica a los cargos públicos de la Casa Conceyu, amenorgar estes asignaciones; per un llau amenorgar un 20% la asignación por l’asistencia a plenos y comisiones; per otru, propunsimos que la persona lliberada, con sueldu de la Casa Conceyu cobrase’l sueldu medio d’un trabayador/a del conceyu sigún los estudios estadísticos oficiales del momentu. Con estes midíes queríemos que la Casa Conceyu de Carreño venceyárase a la austeridá impuesta a la ciudadanía que desixen el restu d’alministraciones. Estes propuestes foron negociades con otros grupos municipales y finalmente aprobades nel Plenu de Carreño. Gracies a les propuestes de Compromisu por Carreño, el nuesu conceyu, que ye’l tercer municipiu en rellacion presupuestu/habitante, ye un exemplu d’austeridá nes asignaciones a los carogos públicos del conceyu". Esto tradúxose nel cobru de 3920 euros en dietes pola asistencia a 83 comisiones y 15 plenos en 2012, según informa l’edil.

"La cleptocracia combátese dende la propia política, amosando les diferencies ente ellos y les persones que, como los conceyales de Compromisu por Asturies, trabayamos de manera llimpia, sincera, cercana y arguyosa pol nuestru conceyu. Porque los conceyos son estructura organizativa tradicional d’Asturies, la forma alministrativa más cercana a la ciudadanía y onde los políticos son a desarrollar el so trabayu más eficazmente y, les más de les veces, compatibilizando los sos trabayos col serviciu públicu", afirma Holgado, que tien como oxetivu "una Asturies onde la política nun seya sinónimu de sospecha, sinón de trabayu y tresparencia. Por ello tamos arguyoses y arguyosos de mostrar a los nuestros votantes, simpatizantes y les persones qu’éntá nun nos conocen, el nuestru compromisu éticu con una sociedá más xusta ya igualitaria".