Firma pola llibertá de Molina

21 de xineru de 2014 DE 2014 • Glayiu

Dende la plataforma ciudadana "Conceyu pola llibertá de Molina" están trabayando dende’l mesmu momentu del so cautiverio, pola lliberación de la osezna. Nesta ocasión tán recoyendo firmes por que la osa sía reintroducida nel so hábitat natural, evitando una vida de cautiverio como atracción turística.

La razón pa condergar a la nueva osezna "Molina" como atracción turística na corralada, ye l’avanzada edá de les oses Paca y Tola, sufriendo esta postrera una enfermedá neurolóxica qu’enzanca gravemente la so movilidá. El relevu que supon la osezna ye’l frutu de les presiones polítiques de los conceyos venceyaos económicamente a eses instalaciones deplorables, pa dar continuidá a la corralada osera agora qu’escóseseyos la vida a les vieyes oses, Paca y Tola. Presiones que vienen d’antes de dar con "Molina", y que a muchxs de nosotrxs caltuviéronnos alerta una vegada foi alcontrada. Lo que dexó una rápida oposición entamada.

Ye precisu dicir, que yá esiste’l precedente de reintroducir a dos oseznas: en 2008 cola osa "Villarina", y en 2011 cola osa "Lara". Dambes reintroducíes con ésitu nos montes asturianos. Más allá, esta plataforma consiguió que’l canadiense Charlie Russell, unu de los espertos más importantes del mundu n’osos, y más concretamente, nel so reintroducción al hábitat natural, respuenda con un informe la reinserción de "Molina". Y ye que, magar tou, entá ye posible reinsertar a esti animal nos montes d’onde foi arrincada. Pa ello, esta plataforma cunta con otru informe de viabilidá esplicando’l procedimientu de deshumanización que se llevaría a cabu, pal so posterior puesta en llibertá mientres la primavera.

Nes nueses manos ta’l futuru de la osa. La nuesa implicación va torgar que "Molina" sía víctima de los intereses turísticos y l’incompetencia política. Les nueses firmes van acabar onde deben, na mesa de los responsables esixendo la lliberación de la osa por que nunca se vuelva a repitir nenguna cárcel turística al serviciu de la irresponsabilidá y la desconsideranza caprichosa de "los nuesos" políticos. Salvemos a esti animal, y otros nun van pasar polos mesmu.

¡MOLINA LLIBERTÁ!

http://www.change.org/es/peticiones/que-la-osa-molina-sea-reintroducida-en-su-h%C3%A1bitat-natural-evitando-una-vida-de-cautiverio-como-atracci%C3%B3n-tur%C3%ADstica?share_id=ejNzSXtqZv&utm_campaign=share_button_action_box&utm_medium=facebook&utm_source=share_petition