FAMYR reivindicará en Xixón el Frente Popular

7 de febreru de 2013 DE 2013 • Glayiu

El próximo 16 de febreru conmemórase’l 77 aniversariu de la victoria ellectoral del Frente Popular. La represión de la Comuna asturiana del 34 afaló un procesu xunitariu qu’amestó a la práctica totalidá de les fuerzes d’izquierda y que cristalizó na candidatura del FP nos comicios de febreru de 1936. El Frente Popular ganó les elleiciones y propició con ello la sublevación de los militares reaccionarios.

Dende la Federación Asturiana Memoria y República convoquen una concentración pal sábadu 16 de febreru na Plaza’l Palaciu de Revillagigedo de Xixon "pa conmemorar el Frente Popular y reivindicar procesos de unidá análogos a aquel colos que poder vencer al cada vez más ofensivo avance d’un facismu sociolóxicu y políticu, antroxáu de neolliberalismo, y abrir asina un procesu constituyente republicanu pa superar las llimitaciones heredaes tovía del franquismu", dicen los organizadores. La invitación ta abierta a la participación directa de toles persones que quieran espresar el so parecer sobre lo que fue el Frente Popular, y a les organizaciones que quieran llantar puestos con materiales.

Esti ye’l manifiestu que lleerá FAMYR na concentración:

El 16 de febreru de 1936, trunfa nunes elecciones el Frente Popular. Esti modelu que configuraba un procesu de xuntanza de les fuercies mas representatives del campu popular, abre una recatafila d’opciones polítiques que nos años posteriores foron interpretaes davezu por casi los mesmos actores, anque n’escenarios distintos. El fechu de que partíos políticos estremaos axustaren no que foi el Frente Popular, nun se pué entender si nun s’esplica col procesu entamáu n’Asturies del 34. Esti procesu revolucionariu supuso en tolos sentíos un reblagu, un blincu curiosu nes necesidaes oxetives de la clase obrera, non sólo n’Asturies, sinon en tol Estáu español.

Esti fechu marca definitivamente’l modelu del Frente Popular que s’entama nel Estáu español y que ye poco menos qu’irrepetible al traviés d’estos años. Les esperiencies postreres nun pasaron de ser simples pautos de gobiernos, ente socialdemócrates y comunistes ortodoxos, sin otru envís que xestionar el modelu capitalista, cola traza de los alcuerdos ente direcciones, y qu’ente uno y otro lleva al fracasu a estes esperiencies.

El modelu que siguió el Frente Popular nel Estáu español foi radicalmente distintu: tuvo desde l’aniciu una fonda vocación revolucionaria; taba iguándose la unidá de la clase; dempués na Guerra civil españó, esa ye otra historia. Pero nesti momentu esta necesidá marca un oxetivu claru y un modelu que se tresnare na base.

Dientro de lo que sinifica’l Frente Popular pa toos nosotros, ye importante resaltar les "connotaciones modernes" que conlleva porque, a la fin, les propuestes polítiques afechisques nun finen y acaben repitiéndose meyoraes nel cursu de la hestoria de la llucha de clases. Ye esti modelu políticu el que tien qu’ispiranos, xunto a los fechos hestóricos, conocíos de sobra por toós nosotros, pa entamar les sinerxies necesaries, pa finar con esti capitalismo qu’amorrina. Poro ye mui importante sacar les llecciones pertinentes que nos dexa’l Frente Popular. Esti procesu dende la base, horizontal, esta xuntanza efectiva del campu popular, eses mestures, resumiendo, esa cata de la síntesis, como oxetivu revolucionariu, ye yá una realidá, desgraciadamente, namás nel maxín de la izquierda revolucionaria nel Estáu español. Anguaño naide nesti campu niega esa necesidá oxetiva, otra cosa ye l’aplicación práctica que ye revegosa, pero’l fechu de que se dieren eses xuntances ideolóxiques, de que toos faigamos el mismu diagnósticu d’aquella rialidá política y social, too esto debémos-ylo en parte, a aquella autoorganización de los trabayadores, que diría Marx, que foi’l Frente Popular de 1936, que güei venimos a recordar a festeyar y a reivindicar nesti actu.