Estos tipos maten facistes

Fundación Robo cumple un añu dando el cante

22 de ochobre de 2012 DE 2012 • Glayiu

Fundación Robo cumple un añu. Esti esperimentu sonoru persigue facer de manera colectiva un activismu musical críticu. Crear canciones de protesta cola collaboración de diferentes artistes. Cualquiera y dende cualquier xéneru puede aportar lo que lleve dentro, porque como dixera aquel bardu qu’acabó d’amigu del papa “nun necesites al paisanu del tiempu pa saber en qué direición sopla’l vientu”.
Los asturianos Nacho Vegas, Arma X y Mar Álvarez, responden a la iniciativa entamada por Roberto Herreros.

Robo - Esta tierra es nuestra from Jordi Castells on Vimeo.

[Semeya Juan Tizón]

Roberto Herreros (a la derecha na semeya) ye un culu inquietu. Yera l’alma mater del grupu pop de lletres incisives Grande-Marlaska (enantes llamáu Garzón, hasta que’l superxuez menació con llevalos a los tribunales), guionista del programa de TVE Mapa sonoro y miembru del colectivu activista madrilanu Ladinamo. Nun-y debía de paecer abondo. Necesitaba más. Asina que soltó a los perros y enllordió a xente tan diversa como Nacho Vegas, Karlos Osinaga, Joseba Irazoki, Albert Pla, Fernando Alfaro o el mesmu Oscar Mulero nuna aventura sonora denominada Fundación Robo, qu’agora acaba de cumplir el añín.

Ye bastante evidente que la escena musical oficialista taba agalbanada, si acaso daquién llevantaba la voz pa glayar escontra la piratería y desixir más represión contra l’intercambiu de ficheros per Interné. O cuando españó’l pastel de la SGAE algún salió a dicir que qué malos yeren aquellos que prindaran, y que les coses diben cambiar darréu. Más nada.

“Na escena indie había un escesu d’autocomplacencia” afirma Nacho Vegas. Tocaba que los músicos ficieran daqué p’acompañar los nuevos vientos que soplaben cola indignación ciudadana, y Roberto Herreros sacó de la chistera la Fundación. “Ye un esperimentu”, diznos: “un proyectu que va mutando y va garrando diferentes formes. Teníemos claro qu’había que facer algo [dende la escena musical] pa convertir la frustración individual n’enerxía política, y quisimos facelo de manera colectiva. Fundación Robo ye un proyectu que trata de reunir a músicos que tengan una postura política crítica ente lo que ta pasando, pa facer algo musical y colectivo al respecto; pretendemos diluir el conceptu de creación artística, collaborando diferentes persones na creación de cada tema”.

Fundación Robo coincidió nel so naciatu col españíu del 15M y la cristalización del descontentu na sociedá civil. Poro nun faltó quien etiquetara a esti proyectu musical como “la banda sonora del 15M”. “Pa nada, en tou casu, sedríemos un complementu, una collaboración col movimientu” diz Roberto Herreros. La bola de ñeve que Herreros echó a rodar foi recoyendo xente tan válida y tan conocía como los asturianos Mar Álvarez (Pauline en la playa) y Arma X, que participa col so nuevu grupu, Factor Canadá: “Nel hip-hop, si falamos de política, hai de too” diz el MC de Blimea, “pero activistes n’Asturies somos tres. Asina que cuando Nacho [Vegas] me comentó que por qué nun collaboraba cola Fundación prestóme. Porque lo del 15M tuvo bien, siempre ye bueno que la xente salga a la cai, que nun tea amodorrada en casa, pero pa mi quedó bastante descafeinao; la cuestión nun ye facer clases de Tai Chi, sinon de guerrilla urbana”, diz Arma X.

“Yo suméme a la Fundación porque, de mano, tolo qu’entama Roberto suel pareceme mui interesante” confiesa Mar Álvarez: “nel mundín musical hai veces que parez que tamos caún nel nuestru furacu, pudriéndonos coles nuestres histories, y por eso me llamó tanto la idea de participar d’un rollu de creación colectiva. Yera lo mesmo que taba pasando cola sociedá: la xente taba saliendo a la cai en masa, y en masa yera como teníemos que facer música”.

Hip-hop, pop, folk, cumbia, techno, o cualquier estilu personal inclasificable ye igual de válidu pa tresmitir idees polítiques coles qu’influir nos demás. Asina ye y asina s’espera de caún de los participantes: “Yo escoyí participar con una versión del tema de Gil Scott Heron The revolution will not be televised, pero reconvertilo nun tema pop, que ye lo que sé facer y ye lo que me presta” diz Mar Álvarez.

“Decidí participar de manera individual porque Pauline en la playa nun tien una postura política nidia, esplícita, y paecíame que yera más normal caltenelo y facer daqué de manera personal”. Arma X y su nuevo partenaire, col que formen el dúo de hip-hop Factor Canadá, collaboraron con Campeones, un tema de creación propia que satiriza sobre les victories del deporte español.

JPEG - 16.7 KB

Roberto Herreros propusó-y a Nacho Vegas una versión de This land is your land, el clásicu de Woody Guthrie, cantautor estadounidense de los años 30 que llevaba una pegadiella na so guitarra qu’aseguraba qu’aquel “arma” mataba facistes. Guthrie, una de les voces más reconocíes de clase obrera americana, una especie de Steinbeck de la música, yera consciente del enorme poder de movilización que puede llegar a tener una melodía, y nun dudó en afalar la llucha de los trabayadores americanos escontra’l facismu belixerante que tomaba’l poder n’Europa.

Y ye que la música sigue teniendo muncho que dicir cuando de prender conciencies se trata. Na cabera actuación de Vegas n’Asturies, hai unes selmanes n’Uviéu, nes fiestes de San Mateo, presentaba Cómo hacer crack, el primer tema col que collaboró na Fundación, con estes pallabres: "Agora que parez que too se funde, que se van los meyores, primero fue Gabino [de Lorenzo], agora Esperanza [Aguirre], ye’l momentu pa canciones como ésta:

El compromisu de los artistes que participen de Robo ye por partida doble, polo que faen y por cómo lo faen: tolos temes tan baxo llicencia Creative Commons, lo que permite’l so préstamu llibre y gratuitu ente particulares, la so descarga gratuita dende la web de la Fundación, o espardilo per denyuri ensin más requisitu que reconocer l’autoría de la música citando la so procedencia.

Agora, al cumplir l’añu de vida, la bona acoyida que ta teniendo la iniciativa ente la sociedá da los sos primeros frutos materiales. Acaben de conseguir mediante crowfunding el sofitu económicu necesariu pa espublizar un discu doble y un DVD coles canciones qu’aportaron los diferentes artistes a la Fundación.

Fundación Robo http://www.fundacionrobo.org/