Esperimenta

21 de xineru de 2013 DE 2013 • Nacho Muñiz

1930. Nun pueblu pequeñu de la cuenca minera dellos homes allegaben relixosamente a la so cita selmanal cola tabierna. (La tabierna, el bar, el chigre, la tasca... dio más intelectuales que toles universidaes del mundu, acoyeron más conceyos políticos de les que toles sedes de sindicatos y partíos podríen imaxinar y crearon más revolucionarios que Marx, el Che o Kropotkin xuntos. La derecha sabialo, y falaba d’ella como un centru de perversión pa obreros; la esquierda nun la sabía, y falaba d’ella como un centru de perversión pa obreros tamién.)

Y asina, un socialista, un anarquista y otru comunísta, axuntábense selmanalmente pa tomar unes botelles y aldericar, como toles selmanes, sobre cuála yera la vía correcta que llevaría al pueblu a la so llibertá, que curiosamente ye la mesma pa toos, anque caún la entienda que tien que llegase d’una manera.
Toos dueños de la razón aportunaben en defender los sos postulaos:

- L’anarcosindicalismu va llevanos irremediablemente a una fuelga xeneral xavaz cola toma de los medios de producción per parte los trabayadores... -aseguraba’l primeru.

- ¡Tontures! Namás la organización estricta de los trabayadores puede crear les condiciones... -dicía’l comunista.

- ¡Compañeros! La victoria final va venir educando al pueblu sobre los testos de Marx... -retrucaba’l socialista.

Y asina pasaron los años y ensin dase cuenta aquellos trés homes realizaren una xera impresionante: escucharon, deprendieron, aldericaron, crearon... pero nengún los sos pronósticos fíxose realidá.
Primero porque nel 34 una clase obrera asturiana enfrentóse a un exercitu toopoderosu d’un país imperialista, dende tolos puntos de vista, pos entá güei conserva colonies n’Áfrika; y unos años dempués, col Frente Popular, que nun esperaba la reacción de la burguesía, que nun tarrez n’abrazar el facismu pa nun perder los sos privilexos. Pero fuere cual fuere la razón, nun se dio.

-La via ellectoral nun soluciona nada... -diz mientres protesta por que los políticos camuden les coses.
- Solo la via ellectoral soluciona les coses... -¿Entós, por qué te manifiestes?
- Los anarquistes nun reconocemos esti sistema. -Pos el cabeza de llista per Girona de la CUP yera anarquista. -Nun ye de los de verdá...

Magar d’ello, magar tolos llibros de los que disponemos, de toles esperiencies vivíes polos nuesos antepasaos, de toles conocencies que tenemos al nuesu algame siempres va haber el qu’asegure qu’esti o aquél ye’l camín a siguir, de xuru, de xuru, de verdá... Y anque tiendese a rellacionar esti dogmatismu col comunista hortodoxu, y nun ye pa menos, el dogmatismu estiendese per toles cañes de la esquierda: socialista, anarquista, electoralista, sindicalista, movimisentosocialista, yomismista, ciberprotestante, taberneru... toos tenemos la única y lexítima via posible d’iguar esto.

- La via ellectoral nun soluciona nada... -diz mientres protesta por que los políticos camuden les coses.
- Solo la via ellectoral soluciona les coses... -¿Entós, por qué te manifiestes?
- Los anarquistes nun reconocemos esti sistema. -Pos el cabeza de llista per Girona de la CUP yera anarquista. -Nun ye de los de verdá...

A esto hai que suma-y que’l 90% de la xente cola que fales la tema y te defenden una vía concreta nun faen otra cosa que faer publicidá del so organismu colectivu/sindicatu/partíu y parten d’unes posiciones imaxinaries, nel meyor de los casos, o tiren d’hestoria, nel peor:

- Si’l mio partíu llegara a la Xunta tendríamos... -Yá, pero nun llegues.
- Si convocamos una fuelga selvaxe... -Yá, pero nun puedes nin convocala.
- La unión de toos... -Yá, pero creas el to nuevu chiringu pa que se xunan a ti.
- Si consiguimos ser como’l pueblu de Mamama en 1679 en .... -Valió, anda.

Por esto, y enantes de tomar cualquier decisión, la esquierda de la esquierda oficial tien qu’analizar la situación, refugar dogmes y, sobremanera, saber que la esquierda siempres presumió de científica y la madre de la ciencia ye la esperimentación.

Cuando pensamos n’utopies, pero nun les materializamos, nun entendemos el conflictu. Hai que probar, esperimentar, con cabeza, con conscencia y con autocrítica, y si en 30 años, en 30 años de crisis y con una Asturies cada vegada más probe, faciendo lo mesmu una y otra vegada y lo poco que tenemos ye unos sindicatos pequeñinos, una casa ocupa y un par de centros sociales y unos partíos, tamién pequeñinos, nun hai que ser mui llistu pa saber que bien, lo que se diz bien, nun lo ficimos.

Y yá nun val con resistir.