Entrega d’autoinculpaciones en solidaridá col SAT

12 de febreru de 2013 DE 2013 • Glayiu

El pasáu sábadu 9 de febreru, una ventena de persones, en representación de dellos colectivos asturianos, convocaron un actu públicu, delantre la Delegación de Gobiernu n’Uviéu, pa faer efectiva la entrega de más de una centena d’autoinculpaciones, en solidaridá coles aiciones d’espropiación realizaes pol Sindicatu Andaluz de Trabayadores (SAT) nos supermercaos de Mercadona.

El pasáu mes de payares tuvieron por Asturies Lola Álvarez, responsable del Sindicatu Andaluz de Trabayadores/as en Córdoba y vocera de la ocupación de la finca de Somonte, y José Caballero, secretariu d’Organización del SAT y unu de los deteníos tres l’acción d’espropiación d’alimentos en Mercadona, que nos falaron de les distintes estratexes de llucha del SAT, de la dura represión y de delles de les acciones que fueron desenvolviendo mientres estos meses. Mientres la visita, aprovecháronse los distintos actos entamaos pa recoyer autoinculpaciones pola acción de Mercadona.

El Sindicatu Andaluz de Trabayadores/as, SAT, ye un exemplu de llucha pa tolos colectivos sociales y movimientos sindicales del Estáu. Y, como nun podía ser d’otra manera, esa llucha asitió-yos nel puntu de mira de la represión y la criminalización. Asina, el SAT ye’l sindicatu más represaliáu d’Europa con pidimientos de cárcel de cerca de 50 años, 400 compañeros y compañeres procesaes y 400.000 euros en multes..

El sábadu 9 de febreru, una ventena de persones, en representación de CS La Semiente, CS Sestaferia, CSI, l’Asociación escontra la esclusión Alambique, l’Arcu la vieya, Picu Rabicu, L’Arcu la Vieya y Cambalache, apurrieron más d’una centena de autoinculpaciones nel rexistru de la Delegación del Gobiernu (Uviéu) y lleváronse sellada una copia de caúna, que va ser unviada a les compañeres/vos del SAT.