Entamen los despidos n’APTA

5 de marzu de 2014 DE 2014 • Glayiu

La ONCE y FUNDOSA despidieron esti llunes, a 12 trabayadores del Centru Especial d’Empléu APTA, por razones económiques, demientres que’l pasáu vienres realizaron dos despidos antroxaos de baxes incentivaes. Los planes de la ONCE son despidir a 18 trabayadores y realizar un ERE de suspensión temporal de contratu de dos años pa la totalidá la plantía.

Dende 2011, la ONCE controla’l Centru Especial d’Empléu APTA, que da trabayu a persones, na so inmensa mayoría, discapacitaes y que la so xestión económica y financiera realízase al traviés del Grupu FUNDASA, perteneciente a la Corporación Empresarial ONCE.

En 2012 la ONCE despidió a 103 trabayadores d’APTA, pero tien delles empreses n’Asturies que realicen trabayos de la mesma o asemeyada naturaleza qu’APTA, colo que podría dase una esviación de la carga trabayu dende’l Centru APTA a otres empreses del Grupu, con fines pocu claros.

Pero, en llugar de ser investigada, la ONCE foi galardonada en 2013 col premiu Príncipe d’Asturies de la Concordia pol so llabor pa “ameyorar la dignidá y la calidá de vida de les persones con discapacidá”.

Sicasí, agora, la ONCE non yá nun apurre alternativa dalguna pa los anteriores 103 despidos de 2012, sinón que plantega 18 nuevos despidos de trabayadores que nun tienen discapacidá, pero desendolquen xeres d’orientación y monitorización: ¿significarán una torga pa los sos planes lliquidacionistes?.

La dirección d’APTA plantega dar un xiru al Centru d’Empléu, unviando a la plantía a emprestar los sos servicios nes fábriques de los veceros: ¿tarán preparando la lliquidación del Centru y el pelotazu urbanísticu nos sos equipamientos del Piles, a la entrada Somió?.

Teniendo en cuenta qu’atopamonos ante un Centru Especial d’Empléu imprescindible pa Xixón y p’Asturies, que da ocupación a persones con discapacidá, nun se-y puede tratar en términos economicistes, sinón que requier la solidaridá de tolos asturianos y asturianes, col Gobiernu y el Conceyu de Xixón a la tiesta, pa:

- Realizar una auditoría que revele si la xestión del Centru APTA ye l’afayadiza,

- Collaborar nel algame la carga trabayu necesaria pa caltener ocupaes a la totalidá de los y les trabayadores. El conceutu de rentabilidá social tendría d’obliganos a caltener a estes persones ocupaes y non faciendo cola nos centros de Salú Mental.

- Apurrir les subvenciones necesaries, col rigorosu control correspondiente, pa dar estabilidá al centru.

¡Realmisión de les 103 persones despidíes en 2012!. ¡Nin despidos nin EREs nin especulación!.