En sofitu a los presos políticos saharagüis

27 de xineru de 2013 DE 2013 • Glayiu

Doscientes persones axuntáronse ayeri sábadu frente al Teatru Campoamor d’Uviéu, en sofitu a los 23 presos políticos saharagüis que van ser xulgaos por un Tribunal militar marroquín el próximu vienres 1 de febreru. Los activistes lleven trancaos na cárcel marroquí de Salé Rabar dende finales del 2010 por participar nel campamentu de Gdeim Izik, el mayor actu de reivindicación de la autonomía saharagüi dende’l fin de la guerra. 

Mientres la concentración, denuncióse l’incumplimientu de la normativa internacional per parte de Marruecos, al ser illegal qu’un tribunal militar xulgue a persones civiles, según les condiciones de tortura a les que se vieron sometíes nos dos últimos años.
 
Con esta concentración tamién se quixo denunciar les constantes violaciones de los Derechos Humanos que se viven nel Sáhara Occidental, según la pasividá del Estáu español ante esta situación, a los que s’encamentó a "dexar de mirar a otru llau y faer frente a les sos responsabilidaes".

El comunicáu per parte de los convocantes foi lleíu pol conocíu actor Willy Toledo, qu’estos díes esta por Asturies, como miembru de la Plataforma contra la Represión y poles Llibertaes de Madrid, dando unes charres en Xixón y Uviéu esplicando’l casu de Alfon, el mozu vallecanu de 21 años que foi deteníu y encarceláu 54 dias por un montaxe policial la pasada fuelga xeneral.

Esta concentración, entamada pola Asociación Asturiana d’Amigos del Pueblu Saharagüi, la Lliga d’Estudiantes Saharagüis nel Estáu Español y la Comunidá de Saharagüis Residentes n’Asturies, y sofitada por organizaciones sociales, polítiques y sindicales forma parte d’una acción internacional en sofitu a los deteníos, a la que se sumaron más de 10 países y decenes d’organizaciones internacionales de diversa índole, nel Estáu Español había convocaes concentraciones similares nes principales ciudaes, cómo en Madrid, Barcelona, Zaragoza, Granada, Vigo, Santander, Valencia,...

Más información sobre la campaña

DOCUMENTOS