El veleru Diosa Maat recala en Xixón en defensa d’una pesca sostenible

26 de xunetu de 2013 DE 2013 • Glayiu

El veleru Diosa Maat d’Ecoloxistes n’Acción recala en Xixón, sol lema “Por una mariña sana y una pesca con futuru”. Quieren recordar que "la pesca y el marisquéu artesanal ye l’apueste más sostenible dende’l puntu de vista ambiental, económicu y social, yá que xenera mayor ocupación llaboral y ye la pesca que menos impactos ambientales trai."

Esti sábadu celebraráse una xornada d’actividaes na Escampada de Poniente, al llau del Acuariu de Xixón, con múltiples actividaes centraes en destacar el trabayu de el pescadores artesanales y sorrayar la importancia de salvaguardar la sostenibilidá y equidad ambiental, económica y social de les comunidaes costeres. A partir de les 11,30 hores podrá esfrutase d’una esposición sobre la importancia de la pesca artesanal y el caltenimientu de los ecosistemes mariniegos, van desenvolvese actividaes pa los más pequenos, va haber charres de pescadores y una degustación de productos provenientes de la pesca y marisquéu artesanal. Amás podrá visitase en grupos el veleru “Diosa Maat” que va tar atracáu nos pantalanes del Puertu Deportivu, xuntu al dique de fomentu, y parolar col patrón sobre los intereses del saléu que tán realizando por tol Cantábricu.

Dende Ecoloxistes n’Acción faen un llamamientu a que tanto les alministraciones como la sociedá tomen conciencia de la necesidá de sofitar a les confreríes llocales por que les barques vuelvan a los puertos pesqueros y l’actividá de desembarco de captures vuelva tar presente nes rules. Un sofitu qu’empieza nes y nos consumidores.

Ecoloxistes n’Acción recuerda que la pesca y el marisquéu artesanal ye l’apueste más
sostenible dende’l puntu de vista ambiental, económicu y social, yá que xenera mayor ocupación llaboral y ye la pesca que menos impactos ambientales trai. Sicasí, esta actividá ta seriamente amenaciada pol baxu preciu que puede algamar en rula’l pexe, los altos costos mensuales, la escasez de relevu xeneracional y la sobrepesca
industrial.