El Prestige ye’l colofón d’una catástrofe medioambiental, democrática y xudicial.

14 de payares de 2013 DE 2013 • Glayiu

Pa Compromisu por Asturies “la dimensiones catastrófiques en materia medioambiental son evidentes, especialmente pa Galicia, pero tamién p’Asturies” y el mensaxe que se da dende les instituciones españoles ye “tan claro como deprimente, contaminar la mariña ye gratis y yá vamos faer que lo paguen los nuesos ciudadanos”.

Pal voceru nacional de Compromisu por Asturies, Daniel Fernández, se trata de “una catástrofe democrática, porque toles mentires del gobiernu del PP mientres la catástrofe tuvieron como resultáu la impunidá, y el premiu de la Presidencia pa Mariano Rajoy, una y bones el PP pagó-y cola candidatura a presidir el Conseyu de Ministros por poner la cara nesta catástrofe, y yá son famoses munches de les declaraciones del actual Presidente de Gobiernu referíes a esta catástrofe y la so indolencia frente les sos causes, consecuencies y responsables”.

Compromisu por Asturies piensa que “la catástrofe xudicial ye clara, porque
que nun esista nengún responsable de qu’un barcu tan peligrosu como’l
Prestige navegue poles nueses mariñes, ye bien malo d’entender pola
ciudadanía” anque asumen que “l’ausencia de medios del xulgáu qu’atendió
esta causa yeren patentes, y demuestra una vegada más que la xusticia ta
diseñada a la midida de los poderosos, y que’l sistema xudicial siempres
queda coxu a la d’esixir responsabilidaes a grandes intereses económicos y a
los responsables políticos”.

Daniel Fernández asegura que “l’ausencia de responsabilidaes polítiques y
xurídiques debilita a la democracia, porque ye imposible que nun sistema
democráticu la mayor catástrofe ecolóxica que sufrimos acabe cola mayor de
les impunidaes y asumiendo los costos les víctimes de la mesma catástrofe” y
concluyo indicando que “encamentamos a que se recurra esta sentencia y a
que’l gobiernu asturianu solicite tal recursu, porque’l Prestige yá degradó
al máximu la nuesa mariña y agora va facelo coles instituciones”.