El Niemeyer veta la oficialidá

19 de abril de 2013 DE 2013 • Glayiu

El centru cultural avilesín impide la cellebración nes sos instalaciones del XXV Conciertu pola Oficialidá. Esti cuartu de sieglu conviértelu nún de los festivales musicales de más tradición y trayectoria de los que se faen n’Asturies. Sicasí, pa la Fundación Niemeyer parez nun ser motivo abondo importante. Dende la Xunta pola defensa de la llingua asturiana, llamenten esta situación y denuncien el vetu "ridículu".

El valir simbólicu que tien l’acontecimientu pa la música asturiana y la reivindicación llingüística fíxonos pensar nuna vuelta a la ciudá que lu vio echar a andar allá pel añu 1989; y ye que foi Avilés l’escenariu d’aquel primer conciertu de reivindicación de la oficialidá.

JPEG - 142 KB
cartelo1989

"Pa dar acoyida al conciertu pensemos entós nun espaciu simbólicu de la que se quier imaxe nueva de la ciudá: el Centru Niemeyer. Un espaciu y una esplanada qu’al paecer del so diseñador habíen tar abiertos a la participación del pueblu. Pero bien se sabe qu’una cosa ye la teoría y otra la visión más prosaica de los nuestros próceres y allegaos. Cuando nos entrevistemos colos responsables directos de facer posible’l disfrute de la instalación, viemos bien rápido la ideoloxía real que’l poder tresmite a esti tipu de, como-yos dicen, ’contenedores culturales’: nun se busca la igualdá o la participación, sinón simplemente la fachada, l’apariencia o asonsañamientu brutu. En definitiva, punxeron sides pa nun dicir que nun queríen actos reivindicativos de la oficialidá: nun había feches, yera demasiao tarde, yá se reunió’l patronatu..., pero si-yos viniere la propuesta de cualquier estrella, reconocieron, yá lo iguaben pa que pudiere actuar en pocos díes.
Al final, dalguna utilidá habíen tener estos mausoleos faraónicos de la castra política asturiana: son los que meyor van falar nel futuru de la so ideoloxía escarniada: en nome de la cultura y la participación xenérase un discursu y unes polítiques que tienen como resultáu un decoráu de cartón-piedra pa favorecer y, sobre too, xustificar l’apartheid y llavar l’auto-odiu", diz la organización más veterana de la reivindicación llingüística.

Dende la Xunta pola defensa de la llingua asturiana, se llamenten d’esta situación y denuncien el vetu "prevaricador" que reciben pa la realización del conciertu nes instalaciones del Niemeyer. "Porque si yá ye grave’l fechu en sí, más grave ye que s’aluda a normes y reglamentos que a la fin resulta que solo tienen que cumplir unos y otros non", retruca la XDLA.

DOCUMENTOS

cartelo1989