Reacciones a la cerrazón de Fomentu sobre la señalética n’asturianu

El Ministeriu nun pondrá la toponimia oficial nes señales "porque namás el castellán ye la llingua oficial"

26 de avientu de 2012 DE 2012 • Glayiu

El Ministeriu de Fomentu vien d’anunciar que la señalética cola toponimia de les localidaes asturianes sedrá en castellán "por ser esta la única llingua oficial del Principáu". Retrucaba asina per escrito a Jesus Iglesias nel Senáu. Iniciativa pol Asturianu denuncia que "a diferencia de la llingua, la toponimia n’asturianu sí ye la oficial". Compromisu por Asturies fala de "insultu del gobiernu del PP al autogobiernu d’Asturies".

En respuesta a lo dicho estos díes pol Ministeriu de Fomentu dempués de qu’un diputáu d’Izquierda Xunida ficiera una entruga per escrito al mesmu por petición d’Iniciativa pol Asturianu, la organización denuncia que’l Ministeriu de Fomentu manipula la llexislación al so favor. Si bien l’asturianu nun ye tovía oficial, la toponimia tradicional recuperada y aprobada pol Gobiernu d’Asturies sí que tien esi rangu, y ye d’usu obligáu pa tolos estamentos públicos, incluyíu’l Ministeriu que xestiona les carreteres estatales.
La normativa que cita Fomentu na so respuesta refierse a la rotulación d’información nes señales, casu de lletreros como "toles direcciones", "salida", o "centru ciudá", que nes carreteres estatales tien que ponese nes llingüesoficiales del territoriu pel que pasa, pero en nengún casu a la topinimia. Los nomes de llugar tienen que ponese en tolos casos na forma na que tán oficializaos nel BOPA.
Énte esta respuesta, Iniciativa pol Asturianu va solicitar un conceyu col Delegáu
del Gobiernu n’Asturies, Gabino de Lorenzo, y el responsable de Formentu na comunidá, al envís de buscar solución a esta llamentable situación d’illegalidá, amás d’aprovechar pa tratar otres cuestiones d’importancia pal idioma y que dependen del Gobiernu d’España.

Compromisu por Asturies denuncia "l’insultu del gobiernu del PP al autogobiernu d’Asturies"

Compromisu por Asturies fixo pública esta mañana la so postura respecto a la negativa del ministeriu de Fomentu d’usar la toponimia oficial asturiana nes carreteres del país. La organización política asturiana califica de "demencial qu’un Ministeriu dea una respuesta que ye un auténticu insultu a la intelixencia, a la llexislación y al autogobiernu d’Asturies".
Compromisu recuerda que la toponimia local ye de competencia autonómica y que dende hai años n’Asturies existe un procesu de recuperación toponímica, independientemente del estatus xurídicu de la llingua asturiana, pol que ye necesario axustar los topónimos de les carreteres a les formes aprobaes pol gobiernu asturianu y que con esti argumentu lo único que queda claro ye la fobia escluyente del gobiernu del PP a tolo que s’asemeye a la capacidá d’autogobiernu y al respetu a les decisiones de les instituciones asturianes. Amás, la organización considera qu’esta noticia, xunto cola esclusión de la llingua asturiana dientro de la llamada Llei Wert ye un exemplu más de que’l gobiernu del PP pretende rematar el llabor de desaniciu de la llingua asturiana que yá entamaron gobiernos de tendencies distintes nes anteriores llexislatures, echando p’atrás mesmamente lo poco que se fixo nel procesu de normalización del idioma.

Dende Compromisu por Asturies pídese "una respuesta contundente y digna de les instituciones asturianes" y recuerden "que’l marcu llegal que quitaría les escuses pa la marxinación de la llingua ye la oficialidá polo que pide al conxuntu de la sociedá asturiana y a los partíos politicos presentes na Xunta Xeneral, que se reabra la reforma del estatutu d’autonomía pa recoyer, ente otres reformes necesaries, la declaración d’oficialidá".