El cabu Peñes ye más grande qu’Arabia y tolos mapes lo silencien

17 de xineru de 2013 DE 2013 • Pablo X. Suárez

Somos cristianos vieyos y pasamos de la venta. D’ehí que al pasar el túnel d’El Negrón, tal se diz, la sidra avinagre y sepa peor, lo qu’aplicao a la vida práctica y económica ye lo mesmo qu’afirmar la imposibilidá d’una esportación amañosa. El mercáu internu ye otra cosa, y nél intercambiu ta medianamente permitíu. Lo que ye equí vendemos a la mínima, lo mesmo al colega qu’al chigreru de confianza. Sabemos lloramicar perfecto les condiciones del preciu.

Por eso’l puticlub Models anuncia pa los prexubilaos les sos primeres xornaes gastronómiques de los callos, mientres la flor de la mocedá emigra.

Nun se nos compra fácil, pues nun sabemos vendenos. La sidra del meyor palu nun pasará la preba’l tunel y arroyará como mexu pela meseta castellana, onde reinará la puxarra vasco, más resistente al pasu del cordal y a los tarrenos llanos. Como si nun fuera verdá que’l cabu Peñes ye más grande qu’Arabia y tolos mapes lo silencien. Pero eso hai que venir al cabu Peñes a velo, contemplar la inmensidá de les ballenes dibuxaes nos paneles del Centru d’Interpretación del Cabu Peñes qu’hai nel faru.

Por eso’l puticlub Models anuncia pa los prexubilaos les sos primeres xornaes gastronómiques de los callos, mientres la flor de la mocedá emigra. Una xeneración entero qu’al pasar El Negrón lleva apegáu a la piel esi mesmu golor de la sidra avinagrao, que nun ye otro que’l pesu d’una historia mil veces repetida. Porque somos cristianos vieyos y lo nuestro, si tien que ser, ye que nos viendan.