Echa un gabitu a les radios llibres y comuñales

20 de mayu de 2013 DE 2013 • Glayiu

Dende Radio QK llegónos una campaña de sofitu a les radios llibres y comunales, ante l’acoso que tán sufriendo per parte de la SGAE y tamién de AGEDI - AIE. Resalten dende la radio llibre uveína "que na mayoría de los casos pon contra les cuerdes la continuidá d’estos proyeutos, tan necesarios y que cuesta tantu trabayu poner en marcha y sacar alantre día ente día."

Nel casu de Radiu QK, tres un actu de “conciliación” nel que solo destacaron les males maneres y l’actitú chulesca del abogáu que representa los sos intereses y los de SGAE n’Asturies, atopense a la espera de la notificación de la so denuncia per vía oficial. La llei na que s’amparen pa caltener esti monopoliu de la xestión de derechos ye fondamente inxusta ya irracional, una d’eses que se deben desobedecer, y obliga a los proyectos ensin ánimu d’arriquecimientu ( ye inxusta tamién pa munchos con ánimu d’arriquecimientu) a pagar un canon mensual abusivu, más los derechos atrasaos por valor de 4.000 euros.

Dende Radio QK, entienden qu’esti conflictu va más allá d’un fechu puntual, que la presión d’estes entidaes ta poniendo al cantu de la desapaición a proyectos que lleven décades trabayando de forma voluntaria pa les sos comunidaes, garantizando’l derechu fundamental a la llibertá d’espresión ya información al marxe de los grupos de presión y de tola industria cultural.

Por eso llevaron acabo la selmana pasada una campaña "LA LLIBERTÁ PRIMERO QUE LA PROPIEDÁ" na que se mandaron correos a AGEDI - AIE, p’amosar el refugu a les práctiques que tán poniendo en serio riesgu de supervivencia de proyectos ensin ánimu d’arriquecimientu y autogestionados, que realicen un llabor perimportante garantizando’l derechu a la información y la llibertá d’espresión.