De "pura pantomina" califica Compromisu l’alcuerdu PP-UPyD sobre desagospios

4 de avientu de 2012 DE 2012 • Glayiu

El Partíu Popular y UPyD vienen de consensuar un decretu escontra los desagospios por iniciativa de los populares y sofitu de los unionistes. Compromisu por Asturies rechazó por “ser pura pantomima” el decretu col que supuestamente trata de paralizar la xeneralización de desagospios. "Esti decretu nun regula la dación en pagu nin la paralización de los intereses de demoranza mientres los dos años de moratoria".

Yolanda Huergo, vocera de Compromisu por Asturies, considera que la norma aprobada ye claramente insuficiente y nun recueye les lexítimes reivindicaciones de la sociedá: “Ye un insultu pa les persones que se ven afectaes anguaño y pa les que lo tarán nel futuru calificar de plan paralizador” a un conxuntu de midíes que fueron dictaes dende la primera hasta a la última coma polos dirixentes de les grandes entidaes bancaries, cuando lo importante nesti decretu foi velar porque los bancos nun vean amenorgaos los sos intereses”.

Pa Huergo esti decretu “nun regula de nenguna de les maneres la dación en pagu nin la paralización de los intereses de demoranza mientres los dos años de moratoria. Por tanto, y una vegada escosáu esi plazu, les persones van atopase sí o sí con una delda que nun dexó de crecer en nengún casu. Amás d’escaecese de manera clara y evidente de la denuncia que per parte de l’Abogada Xeneral de la Unión Europea se fixo sobre la desprotección xurídica y llegal que sufren les
persones en situación de desagospiu, a les que l’ordenamientu xurídicu vixente dexa nuna situación d’indefensión absoluta” señalando amás “que solo’l 2% de la población va poder sumáse si asina lo quier a esti plan dau lo restrictivo de los requisitos personales solicitaos”.

Huergo declaró que ”ye fundamental que se tengan en cuenta les reivindicaciones de la sociedá que pasen pola asunción per parte de los bancos de la dación en pagu, amás del establecimientu de moratories firmes y series onde los intereses nun aumenten al 27% como asocede anguaño, amás de la redacción y aprobación d’una nueva Llei de la Propiedá Hipotecaria y otra d’Enxuiciamientu Civil que protexan los derechos de les persones, ensin escaecer la necesidá de reestructurar en fondura un sistema bancariu y financieru que ta afogando ensin reconcomiu dalgunu a les persones trabayadores.”