Darréu refuga un nuevu actu de propaganda españolista

14 de payares de 2013 DE 2013 • Glayiu

Mañana 15 de payares Uviéu acoyerá un “Acto Militar Solemne de Jura de Bandera”. Dende Darréu treslladan su refugu a estos actos, que tachan de estar claramente enfocaos haza la propaganda de la ideoloxía dominante impuesta poles élites del estáu español, les más interesaes nel caltenimientu non sólo del orde económicu actual, sinon tamién del “orde territorial”

Mañana vienres 15 de payares la Plaza La Catedral d’Uviéu acoyerá un “Acto Militar Solemne de Jura de Bandera”, nel que toa persona civil que s’inscriba podrá participar nesta xura de la bandera española. Amás, va a imponese la “Corbata de la Orden de Isabel La Católica” al reximientu “Príncipe nº 3”, participante en misiones béliques imperialistes como Irak, Líbano o Afganistán.

Dende Darréu quieren treslladar su refugu a estos actos, que tachan de estar claramente enfocaos haza la propaganda de valores propios del nacionalismu español y, en definitiva, de la ideoloxía dominante impuesta poles élites del estáu español, les más interesaes nel caltenimientu non sólo del orde económicu actual, sinon tamién del “orde territorial”.

Nesi sen, consideren una vergoña qu’una institución como l’exércitu español, tan enllena de sangre d’obreros y obreres asturianes, campe a les sos anches peles cais de la capital asturiana, y pueda non sólo desendolcar los sos actos apoloxistes de valores reaccionarios, imperialistes y españolistes, sinon tamién ser premiaos pola so participación n’invasiones empobinaes al beneficiu de multinacionales.

D’otru lláu, tamién creyen que la práutica pública d’actos como esta “xura de bandera” tienen na mocedá a un oxetivu bien claru, tanto pa la so participación como pa que los perciba como daqué normal. Ye una vertiente más de les aiciones propagandístiques desendolcaes pol poder, como lo puede ser l’usu d’ésitos deportivos pa esparder l’españolismu. Poro, faen tamién un llamáu a la mocedá pa nun participar d’esti tipu d’aiciones, entamaes polos mesmos que-yos roben un futuru dignu n’Asturies.

Énte un presente nel que se reprime por falar les llingües propies d’Asturies, por protestar escontra la situación d’emerxencia social que vivimos, o pola falta d’oportunidaes pa la mocedá, tanto nel tarrén educativu como nel llaboral, dende Darréu dicen NON a los responsables, a les sos instituciones, y los sos actos propagandísticos.