Darréu denuncia "coordinación de Policía y neonazis pa combatir la rempuesta social"

19 de febreru de 2013 DE 2013 • Glayiu

La organización xuvenil Darréu denuncia "coordinación" ente la Policía Nacional y grupos neonazis pa "combatir la rempuesta social" a la crisis capitalista. La denuncia vien sobremanera lluéu de qu’una veintena de facistes fueran expulsaos de L’Acerona polos manifestantes y escoltaos pola Policía hasta un llugar más seguru, como puede vese nel videu axuntáu.

La organización d’izquierda soberanista rellaciona lo que pasó na mañana del sábadu colo qu’asocedió na tarde d’esi mesmu día, cuando "la policía cargó, xunta los neonazis, contra la concentración antifacista que se cellebró, pa protestar contra una charra nun espaciu público onde intervino un neonazi".
El sábadu 16 cellebróse una charra sobre la División Azul nel Antiguu Institutu Xovellanos de Xixón a cargo de Carlos Caballero, historiador venceyáu a publicaciones filofacistes. "Los organizadores de les xornaes d’Hestoria Militar siguieron alantre cola charra d’un neonazi depués de saber que podría haber problemes y de saber quién yera realmente este señor. Tuvieron informaos tamién, en too momentu, de qu’esta persona tenía espublizaciones de calter racista, imperialista y facista, editaes, dalguna d’elles, por editorias abiertamente facistes. Sicasí, nun movieron un deu pa refugar problemes y siguieron alantre con esta conferencia", denuncien dende Darréu.
Denuncien tamién la "total impunidá cola qu’actúa la estrema drecha n’Asturies. Decenes de neonazis llegaron a la manifestación de la Plataforma d’Afeutaos pola Hipoteca col envís de reventar esta convocatoria y esparder el so mensaxe xenófobu, siendo espulsaos de la manifestación poles persones que taben na Plaza L’Humedal, non enantes d’agredir y amenazar a munchos manifestantes. La Policia Nacional escoltó a los mesmos depués de la so provocación, protexendo a esti grupu y ensín nenguna consecuencia pa colos provocadores, pesie a espardir públicamente idees racistes y agredir ya insultar a dalgunos ciudadanos. Nun ye la primer vegada qu’actúen d’esta forma, infiltrándose nos movimientos sociales y actuando cola collaboración y complicidá de la Policía española".
P’acabar, aprecien "total coordinación, complicidá y collaboracionismu d’esti tipu de grupúsculos racistes y la Policia Nacional. De toes y toos ye bien sabio que munchos d’estos elementos ultra-derechistes trabayen nos cuerpos de represión o tienen una clara vinculación con ellos. El sábadu la polícia reprimió a golpe toletazu la concentración antifacista que s’entamó en señal de protesta y nesi intre los neonazis aprovecharon pa dar salida a la so violencia contra la rempuesta social, agrediendo al mesmu tiempu neonazis y policia a dellos ciudadanos, inorando la Policía Nacional estes agresiones y furrulando d’una forma mui compliz con un grupu violentu d’estrema drecha".
Acaba’l comunicáu de Darréu alertando "del peligru del xorrecer d’estos grupúsculos d’estrema drecha y animamos al Pueblu Trabayador Asturianu a, como fexo’l pasáu
sábadu, separte a estos elementos reacionarios de les lluches sociales d’anguañu. Estos grupos actúen, como la mesma policía, de fuercies de choque de los intereses del Estáu Español y los capitalistes contra la rempuesta y axitación social. Por muncho que quieran aparentar, con un mensaxe populista y pseudosocial, unos fines comunes, son los mesmos defensores de la intolerancia, el capitalismu y la reación facista de siempres".