Contra les deportaciones d’inmigrantes

9 de marzu de 2014 DE 2014 • Glayiu

Na mañana d’ayeri cerca d’un centenar de persones convocaes per La Ruta contra’l racismu y la represión concentrose poles céntriques cais d’Uviéu pa denunciar el papel que xueguen los responsables de los vuelos de deportación.
Les redaes racistes pa enllenar estos vuelos y pa caltener ocupaes les celdes de los CIE tán a la orde del día

Dende va unos meses venimos documentado y denunciando vuelos de deportación dende l’Estáu español con destín a Senegal, Nixeria, Marruecos, Colombia y Ecuador.

Les redaes racistes pa enllenar estos vuelos y pa caltener ocupaes les celdes de los CIE tán a la orde del día. En Asturies, unu de los llugares con menos inmigración del Estáu, hai redaes nes estaciones de tren y autobuses, nos parques, a la puerta de los llocutorios y de les asociaciones y albergues.

En tolos casos que conocemos, la compañía aérea qu’ufiertó los sos "servicios" al Gobiernu español ye Air Europa. Esta compañía, que forma parte del Grupu Globalia, tien un contratu robláu, que xube a casi 12 millones d’euros, pa efectuar el treslláu de ciudadanos estranxeros y de los funcionarios policiales encargaos de la so custodia ente diversos puntos del territoriu nacional y dende estos a otros países.

Dende La Ruta contra’l racismu y la represión denuncien a los responsables d’estos vuelos de deportación: la Brigada d’Extranxería, sol mandu de Gabino de Lorenzo, y les sos detenciones racistes; l’aparatu xudicial que decreta l’internamientu nos CIEs, con xueces como Francisco Javier Rodríguez Llongos; les empreses del Grupu Globalia, como Air Europa, Ferre Viaxes, Travelplan o Viaxes Ecuador, que ponen los sos aviones al serviciu del gobiernu pa deportar a les persones inmigrantes acusaes d’una falta alministrativa: nun tener papeles.

DOCUMENTOS