Contra’l zarru de CocaCola en Cualloto

26 de xineru de 2014 DE 2014 • Glayiu

Un centenar de persones ente trabayadores y vecinos de Cualloto concentraronse nes puertes de la Coca-Cola esti xueves pasáu pa protestar ante l’anunciu de zarru tres 52 años d’actividá. La plantiya asegura que "Coca-Cola ganó más de 60 millones na so planta de Cualloto dende 2009".

Coca-Cola Iberian Partners propunxo un ERE que va afectar a 1.250 trabayadores, con más de 700 despidos y cerca de 500 recolocaciones, amás del zarru de la planta de Cualloto plantega cerrar les plantes de Palma de Mallorca, Alicante y Madrid.

Los trabayadores envaloren qu’el 90% de los 144 emplegaos de Asturbega, la compañía asturiana fabricante de Coca-Cola, Fanta y otros refrescos, va vese afectáu, d’unu y otra manera, pol plan de zarru.

Coca-Cola tien previstu prexubilar a unos 350 trabayadores, sicasí, el comité de Cualloto asegura que la midida non traumática va tener un efectu bien llindáu na planta asturiana, que tan solo hai unos 9 ó 10 emplegaos que, por edá, podríen acoyese a dicha midida. Ya que la media d’edá de los emplegaos ye de 41 años.

Son munchos los que llamen a dexar de consumir productos d’esta marca, ye’l casu de Darréu, Mocedá d’Esquierda Soberanista, "Coca Cola, iconu del imperialismu, abandona la so producción n’Asturies anque la factoría tien beneficios. Poro, ye xusto qu’Asturies respuenda d’una forma firme y coherente a esta maniobra de la empresa. Amás entendemos que tenemos de empezar a camudar nós mesmos pa camudar realidá social. Por tantu llamamos a la xente a nun consumir productos d’esta marca comercial qu’asesina a sindicalistes en terceros países, contamina espacios naturales que son de la humanidá y abandona a la so suerte a cientos de trabayadores."

DOCUMENTOS