Conceyu Abiertu de Llangréu critica les midíes d’axuste del Ayuntamientu

Pide, pela cueta, que s’amenorgue’l gastu n’illuminación navideña

21 de payares de 2012 DE 2012 • Glayiu

La sección llangreana del movimientu políticu Conceyu Abiertu criticó la xubida d’impuestos y el plan d’axuste presentáu pol Ayuntamientu de la villa del Nalón. El pasáu 10 de payares el gobiernu local de Llangréu presentaba un nuevu plan d’axuste presupuestariu, o lo que ye lo mesmu, nuevos recortes. Estos recortes afeuten al municipiu n’estremaes manifestaciones.

Per un llau proponen un plan d’aforru enerxéticu, l’amenorgamientu de los teléfonos móviles, los vehículos del conceyu o l’horariu nos equipamientos municipales. Tamién per otru llau, esti recorte va afeutar a los sueldos de los cargos públicos de Llangréu y el personal eventual del Ayuntamientu. Al mesmu tiempu los vecinos y vecines de Llangréu vamos pagar un 5% más n’impuestos y tases del conceyu.
Conceyu Abiertu por Llangréu critica que "al empar que retiren servicios y supuestamente gastos xuben un 5% los impuestos y tases llocales. Nun respuende a la lóxica esta estratexa de María Fernández y el so gobiernu. Los vecinos van pagar más por menos servicios municipales". Entiende CA que "dende’l Conceyu de Llangréu puen empobinase una series de midíes d’austeridá y d’aforru que nun afeuten na calidá de vida de los vecinos".
Critica la formación soberanista que "l’alcaldesa de Llangréu, qu’hasta esti momentu cobra más de 3.700 euros mensuales ye la qu’empobina estes midíes d’aforru y recaldación. A nós, como llangreanos y llangreanos resúltanos que si bien l’alcaldesa nos diz que l’añu qu’entra va amenorgase’l sueldu hasta esti momentu la cuantía recibía ye descomanada".
Tamién hebo rechazu a la política municipal pa cola illuminación navideña: "nun arrenunciamos a que’l Conceyu de Llangréu seya adornáu, pero creemos que se puede ufrir un modelu más responsable y caltenible a nivel enerxéticu y económicu. Amás, al empar que se mos recorta en planes d’empléu o servicios a la vecindá vemos como se desembolsen grandes cantidaes de dineru a esti tipu de coses. La situación socioeconómica d’anguañu desixe primeramente poner a les persones y les sos necesidaes perriba de too".
Atalanta CA que "la responsabilidá d’una falta de perres n’ayalguería del Conceyu de Llangréu tienla de forma íntegra’l gobiernu llocal y otres instituciones supramunicipales, inviertiendo dineru públicu n’infraestructures faraóniques que nun xeneren cuasi emplegu y bientar social. La xestión del dineru públicu nesti Ayuntamientu lleva yá munchos años siendo déspota, irresponsable y clientelista. Hai responsables, cómplices y víctimes".
Como alternativa a esti plan de recortes, CA llama a los responsables del Ayuntamientu de Llangréu "a qu’entruguen y consulten a los vecinos y vecines y al asociacionismu llocal sobre propuestes p’aforrar dineru municipal. Camentamos que la democracia participativa ye’l preséu afayaizu pa facer un conceyu más vivu pero tamién más caltenible, tamién no económicu".