Cruce d’acusaciones ente’l SUP y organizaciones d’izquierda

24 de payares de 2012 DE 2012 • Glayiu

"Ante les declaraciones de corporaciones policiales faciendo referencia a la fola represiva demientres el 14P, nun queremos caltenenos en silenciu" diz la Corriente Sindical d’Izquierda, retrucando al Sindicato Unificado de Policía. [Semeya Xurde Margaride, www.xurde.net]

Conceyu Abiertu tamién reaccionó a les declaraciones del muérganu policial y considera que "foi la propia Policía la qu’incumplió numberoses lleis nel pasáu 14P". Compromisu por Xixón denunció pela so parte, que’l SUP trata a los ciudadanos como delincuentes.

La Corriente Sindical d’Izquierda fizo público un comunicáu como rempuesta al cruce d’acusaciones del Sindicato Unificado de Policía (SUP) y delles organizaciones de la izquierda asturiana nes redes sociales, y a la desixencia pública de la organización policial de depurar responsabilidaes pola concentración de miles de persones delantre la Comisaría de Moreda reclamando la llibertá pa los cuatro deteníos nel 14P.

Diz la CSI: De primeres, intenten tornar l’ésitu de la movilización del día la Fuelga Xeneral, nel que’l pueblu asturianu dio una llección de llucha contra los retayos y les polítiques inxustes que la clas dirixente inténta imponenos, como una xornada delictiva dende la óptica policial, amosando claramente la so esencia como guardianes y represores al serviciu’l poderosu.

De segundes, la policía asítiase siempres al llau de la banca y el capital. Al llau de los mesmos que provoquen miseria y suicidios na clase popular. Al llau de los que privaticen sectores como la sanidá, educación, xusticia,…y toos aquellos sectores que puedan dar dalgún grau de bienestar a la ciudadanía. Por eso’l glayíu de rabia de les y los trabayadores: “los policíes son los piquetes del patrón”. Por eso reprimen les manifestaciones nes que’l pueblu esixe que se cumplan los sos drechos. Por eso prefieren suicidanos en casa, a soles, a venos xuníos na cai. Por eso nun tamos nel mesmu llau, por eso ellos, los policíes, nun son de la nuesa clas.

De terceres, nes sos declaraciones intenten criminalizar a los cuatro compañeros deteníos, intentando presentalos como vulgares delincuentes. Intentando confundir con mentires, como por casu, que tienen antecedentes penales, cuando’l so únicu delitu foi ser solidarios, revindicar una sociedá más xusta, y formar parte d’un piquete informativu llegal. Por ello fueron cutíos, reprimíos y deteníos. Pero la so actuación d’amenaza nun nos va acobardar, nun nos va zarrar en casa. Tuvimos na comisaría sofitándolos porque naide puede quedase solo. Porque, amás de quitanoslo tou, nin siquier-yos gusta que protestemos. Porque somos solidarios y solidaries y tenemos la fuercia la razón.

En cuartu llugar reivindiquen que cualquier persona que sía detenida, polo que a ellos -yos de la gana, tien de pasar la nueche nel cuartón, ensin nenguna necesidá. Inclusive, lleguen a poner d’exemplu, al traviés del so voceru periodiquil, una aparente nimiedad, como’l supuestu d’una señora maltratadora d’un animal que sí quedó detenida tola nueche. Sicasí nun esplicáis la razón de por qué la caltenéis nos cuartones innecesariamente. Quiciabes tendríais de dicir que tou ello ye consecuencia de la vuesa ineficiencia formalizando les dilixencies y que la puesta a disposición del Xuez retrásase cuanto vos da la gana porque’l Xulgáu de Guardia tampoco ta operativu les 24 hores, como ye’l so deber. Con ello evitaría esa pernocta en comisaría, que yá ven con preste, pa remanala como métodu presión.
Notres pallabres: en 24 hores, los y les trabayadores de la siderurxa son capaces de producir cientos de tonelaes d’aceru y chapa, los y les trabayadores de la mina son capaces d’arrancar cientos de tonelaes de carbón, los y les trabayadores del campu son capaces de producir cientos de llitros de lleche..., pero vós, en 24 hores, nun sois capaces de faer unes dilixencies que consisten n’escribir trés o cuatro murnios papeles. ¿Tan complicáu vos abulta?. ¿De verdá resulta creíble qu’una señora, por maltratar a un gatu, tenga de pasase 24 hores en comisaría?. Dende lluéu, el trabayu nun vos escosa.

Nós entendemos que los del SUP precisen salir nos periódicos cuntando les sos mentires, dempués de la rabia que tuvieron de sentir cuando, dempués d’intentar acallantanos, en dengún intre dexamos solos a los nuesos compañeros y, amás, gracies al clamor colectivu, tuvieron de ponelos en llibertá.

En quintu llugar, queremos indicar que cola so represión y malos tratos, nun nos van esviar del nuesu braeru camín, la defensa de los drechos de la clas trabayadora. Por ello siempres nos van a tener enfrente, porque ellos son una pieza fundamental d’esti estáu formalmente democráticu, pero n’esencia dictatorial y represor de les clases populares.

Por tou ello dende la CSI caltenemos el nuesu compromisu de siguir movilizando a la clas obrera y de nun participar con ellos en nengún actu, manifestación o movimientu popular y reivindicativu, pos nun son de los nuesos.

Conceyu Abiertu, Compromisu y el SUP crucen acusaciones nes redes sociales

La formación nacionaliega Conceyu Abiertu amuesó el so "asombru énte les declaraciones asoleyaes en dellos medios de comunicación d’ámbitu asturianu, sobre los fechos acaecíos na Fuelga Xeneral del pasáu 14 de Payares. Esi día la policia antidisturbios incumplió numberoses lleis y normes de rangu llegal, saliendo a la cai como “antipiquete” patronal y gubernamental, queriendo torgar dafechu derechos fundamentales como’l de Lliberta Sindical ya’l de Manifestación como lo demuestra’l fechu de qu’estes unidaes policiales nun llevaben el Númberu d’Identificación Personal, “el númberu de placa”. Nun contentos con ello, el “Sindicato Unificado de Policía (SUP)” lleva dellos díes intentando facer un llaváu de cara énte la criminal actuación de los sos compañeros faciendo por treslladar la responsabilidá a los fuelguistes, criminalizando una protesta social exemplar y que taba teniendo llugar ensin nengún incidente, hasta que los miembros de la U.I.P. entamaron a golpes cola xente que pillaben delantre, tal como puen atestiguar sindicalistes, activistes políticos, periodistes, vecinos y tola xente que perellí pasaba nesi momentu. Esto ye: pretenden facer ver a la opinión pública que los y les fuelguistes creaben un problema d’orde públicu que xustifica la so actuación, cuando lo ciertu ye que los únicos qu’imcumplieren les lleis nes cais de Xixón fue la propia policía.

Asina, nesti día de Fuelga Xeneral del pasáu 14 de Payares n’Asturies la policía polo menos protagonizó delles illegalidaes, siendo les más graves les que vienen darréu:

  • Cometió faltes disciplinaries pergraves, puestu qu’abusó de les sos atribuciones, causando grave dañu a los ciudadanos mandando a dellos a centros de salú y hospital. Amás tamién mintieren sobre la realidá de los fechos pa xustificar el so papel.
  • Atentó ensin motivu escontra la Llibertá Sindical y de Manifestación, derechu fundamental reconocíu en tol ordenamientu vixente.
  • Dende primera hora de la mañana y ensin xustificación posible, les decenes de miembros de la U.I.P. qu’acosaren a los fuelguistes diben embozaos y nun llevaben visible’l so Númberu d’Identificación Personal.

Esto asina, nenguna Policía nel mundu pue nomase de democrática y polo tanto nun tien llexitimidá dala pa invocar les lleis escontra’l Pueblu, cuando nun cumple colos sos mandatos llegales y tien como norma facer de matones de los sos mandos políticos y económicos, dexando de llau’l so mandatu de serviciu a la población y actuando d’espaldes a la llegalidá de forma sistemática y premeditada dafechu, como lo demuestren saliendo a dar palos ensin el so N.I.P. imposibilitando asina la so identificación por quien quiera vese compensáu polos sos escesos y actividá delictiva. Esto, como dicimos, nun ye un fechu aislláu sinón que ye’l vezu, que cuenta col sofitu esplícitu de los dos mayores sindicatos de policía y del PP y PSOE, partíos que controlaren y controlen los mandos políticu-policiales dende la “transición” y qu’encamienten a qu’esto pueda vese agraváu si salen alantre delles midíes llegales como la hipotética persecución llegar por tomar semeyes o videos de les actuaciones d’estes besties del sistema".

Poro, dende’l CA desixeron "una rectificación y disculpes públiques por parte de les asociaciones representatives policiales, sobre los llamentables ataques a los derechos y llibertaes del Pueblu Trabayador Asturianu na pasada Fuelga Xeneral y la posterior manipulación de los fechos". Tamién, camentando les movilizaciones de les corporaciones policiales dos díes depués de la fuelga xeneral-yos reclamaron un "posicionamientu nidiu y ensin medies tintes, si quieren ser consideraes como democrátiques pol conxuntu del Pueblu, escontra toes aquelles midíes que torguen la identificación d’aquelles unidaes policiales que nun cumplan cola llegalidá y exerzan un abusu de poder sobre’l Pueblu reprimiéndolu al serviciu d’intereses ocultos.
Nesti sen, desixeron que "amás d’asoleyar siempres el númberu de placa y que nun se despegue’l velcru sistemáticamente, les propies asociaciones y/o sindicatos policiales garren la iniciativa desixendo una reforma llegal qu’obligue a les unidaes antidisturbios a llevar impreses en grandes lletres el so númberu d’identificación nel pechu y nel llombu, como ya se fai en dellos países de la UE pa garantizar los derechos y llibertaes del Pueblu".
Pa finar CA desixó "la dimisión del delegáu del Gobiernu español n’Asturies Gabino de Lorenzo y de l’alcaldesa de Xixón Carmen Moriyón, como másimos responsables políticos d’estos llamentables fechos que nun puen repetise enxamás".

Compromisu por Xixón, de boca del so voceru, Daniel Fernández, consideró que "el SUP trata a los ciudadanos como delincuentes". "Ye llamentable l’actitú del SUP por solicitar la identificación de los que consideren responsables del bloquéu de la comisaría’l 14 payares. Depués quéxase de que los ciudadanos dexenlos n’evidencia, pos lo tienen bien cenciello, que dexen d’abusar de la so
autoridá y pónganse al serviciu de la mayoría de la sociedá, y non d’unos gobernantes marionetes d’una minoría privilexada que delinque día sí y día tamién, y nun vemos al SUP tan esmolecíu por esos temes”.
Pa Compromisu por Xixón los fechos del 14 de noviembre fueron “la consecuencia directa de l’actitú policial, y como a día de güei les semeyes y videos dexan n’evidencia que’l sindicatu policial ta instalau na técnicad’amedranar al que denuncia los sos abusos, sía un periodista o quién ellos consideren responsables d’una movilización contra les sos desproporcionaes y violentes actuaciones” polo que “tán obsesionaos por meter na cárcel a cualesquier qu’informe de la so forma d’actuar al traviés de reformar el códigu penal”.
Compromisu por Xixón afirmó que “un cuerpu que tien qu’incumplir la llei pa exercer les sos funciones despintando la identificación de los axentes, a cencielles reconoz lo que toos y toes sabemos, que nun tán pa cumplir la llei sinón pa reprimir, y fastidia-yos que denunciemos esa situación” y encamentó al SUP “a lleer los informes d’Amnistía Internacional que critica abiertamente les técniques policiales usaes n’España, ente les que s’inclúin innumberables incumplimientos de la lexislación y los derechos humanos, como por que tengan la desfachatez d’esixir nada a naide, cuando ellos pórtense más como matones que como policías”.
Remató la so declaración Fernández diciendo que “los derechos fundamentales de los ciudadanos tán bien perriba de los intereses corporativistes de la policía, y si quieren que los ciudadanos respeten el so trabayu lo primero que tiene que facer el SUP ye respetar a la ciudadanía, y asaltar la Casa Sindical y
facer detenciones y agresiones gratuites nun ye una amuesa d’ello”.