Compromisu pide a IU que cese a Ángel González

8 de marzu de 2013 DE 2013 • Glayiu

Compromisu por Asturies atalanta que la imputación d’Ángel González, por un presuntu delitu de prevaricación esixe “una reacción clara y contundente per parte del afectáu y de la organización política de la que ye na actualidá voceru del so Grupu Parlamentariu na Xunta Xeneral del Principáu”.

La organización esixe una reacción clara y contundente per parte del afectáu y de la organización política a la que pertenez.

Compromisu por Asturies atalanta que l’aceptación per parte del Tribunal Superior de Xusticia d’Asturies de la denuncia interpuesta pola Fiscalía del Tribunal de Cuentes contra’l quien fuera conseyeru de Bienestar Social y Vivienda, Ángel González, por un delitu de prevaricación y, la consiguiente citación a declarar en calidá d’imputáu, esixe “una reacción clara y contundente per parte del afectáu y de la Organización política a la que pertenez y de la que ye na actualidá Voceru del so Grupu Parlamentariu na Xunta Xeneral del Principáu”.

Entiende Compromisu "los fechos que dan pie a la imputación faense nel exerciciu de les sos funciones como cargu públicu y miembru del gobiernu polo qu’entendemos que, más allá de si tamos o non ante un casu de corrupción política, la imputación d’un delitu de prevaricación, derivada del fraccionamiento de contratos con cuenta de poder tramitalos como contratos menores, a pesar de ser informáu pola Xefa de Serviciu de la illegalidá na que se taba incurriendo, ye de suficiente gravedá pa que se asuman les responsabilidaes polítiques derivaes d’esta situación y que nun pueden ser otres que la dimisión, o’l cese, nos sos cargos políticos” .

A Yolanda Huergo, voceraa de Compromisu, abúlta-y amás que "nun pueden contemplase estos fechos como una cuestión interna d’un partíu sinón qu’afecten al conxuntu de la sociedá. Una vegada más, un responsable políticu imputáu de cometer un delitu, nun actúa poniendo per delantre los valores democráticos y éticos, según la responsabilidá social que s’algama al ostentar la condición de representante públicu, sinón que s’abraza a la defensa de la so xestión política, como si ésta, por bien lexítima que fora, escusára-y del cumplimientu de la llegalidá, máxime, cuando amás ye alvertíu de tal incumplimientu".

Tocantes a Izquierda Xunida, Yolanda Huergo afirma que “nun entendemos cómo lo qu’ayeri mesmu yera blancu güei ye negru. Fai bien pocos díes, Manuel Orviz recordaba al PSOE que tendría de cesar a los cargos públicos imputaos en procesos xudiciales. Sicasí, agora que l’imputáu ye una persona de la so organización reacciona contrariamente a lo espresao, defendiendo a estazón al so voceru parlamentariu y dando por bones les opiniones d’aquellos que caltienen qu’ante la corrupción y l’abusu de poder “son toos Iguales”, desperdiciando una ocasión inmeyorable pa, dende una perspectiva ética y democrática irreprochable, dar exemplu ante la sociedá de llimpieza, tresparencia, coherencia y responsabilidá na xestión pública”.

IU dixebrada ente’l casu González

La coalición d’izquierdes tien pareceres encontraos sobre lo que facer col ex conseyeru imputáu. Delles agrupaciones con gran pesu na organización, concretamente les de Xixón y Mieres, pidieron abiertamente la renuncia de González, o cuando menos, que ponga’l so cargu a disposición del partíu. "Ye bochornosu que Orviz tuviere hai unos díes pidiendo al PSOE qu’apartasen a Migoya y Carlos Madera pola so vinculación col Casu Marea, y agora faiga lo contrario con Ángel González", afirmen dende’l conseyu políticu d’IU en Mieres. "Ta fuera de llugar nun dimitir. Ye imprescindible que los cargos públicos d’IU seyan exemplares y demuestren que somos coherentes", dicen dende’l Caudal.
Sicasí, el ex conseyeru tien el respaldu públicu del actual coordinador de la coalición n’Asturies, Manuel Glez. Orviz, y del coordinador estatal, Cayo Lara. "Un casu de prevaricación nun ye un casu de corrupción", matiza Orviz, quien confía "nel rigor de la fiscalía y la independencia de la xusticia p’amuesar la inocencia de Ángel González". Argumento que comparte Lara, pa quien "diba ser inxusto dafecho destituir a una persona que tovía nun fue xulgada por un asunto de prevaricación, que nun ye corrupción".