Coca Cola: esplotación, desmantelamientu en Cualloto y miseria

17 de avientu de 2013 DE 2013 • Glayiu

Dende Darréu faen un llamamientu a nun beber CocaCola, y denuncien la ’moral’ de la multinacional norteamericana, "la única forma d’acabar colos atropellos empresariales haza la clase trabayadora asturiana, ye qu’esta algame’l control de la economía y, por estensión, del poder políticu. Asina camudaremos paru por trabayu, miseria por bientar, esplotación por igualdá y caltenibilidá"

“Coca-Cola Iberian” tien previsto “reordenar” la so cadarma de plantes embotelladores na Península Ibérica una vez fináu’l procesu de fusión de toes elles nuna única empresa. Asina, la multinacional d’orixe norteamericanu va a zarrar instalaciones y despedir a más de milenta persones, siendo la embotelladora asitiada en Cualloto una de les que cunta con toles papeletes pal so pieslle.

Los 141 trabayadores de la factoría asturiana de Coca-Cola podríen perder el so puestu de trabayu, cola consiguiente repercusión económica direuta ya indireuta que supondría. Dende Darréu camenten que la verdadera cara de la compañía nun ye la que mos amuesen nes sos millonaries campañes publicitaries pal llaváu de la so imaxe, sinon la que pueden sufrir los trabayadores asturianos.

Asina dende la organización avisen de "cómo Coca-Cola vien asesinando a sindicalistes alredor de tol mundu, despidiendo ensin indemnización a trabayadores llatinoamericanos, financiando grupos armaos p’asegurase’l control de recursos naturales, o emplegando procesos de producción qu’atenten escontra la caltenibilidá ecolóxico –por exemplu: pa producir un llitru de Coca-Cola, gástense más de 2 d’agua-. Poro, esta noticia nun ye más que la esperimentación nel nuesu país de los atropellos que la compañía desendolca a lo llargo de tol mundu, y que nun son esclusivos de so: suponen una constante nel facer de les multinacionales d’esti sistema capitalista."

Por eso dende Darréu ven fundamental que la mocedá asturiano garre conciencia de que, detrás del marketing y lo atractivo de la marca, nun hai más que paru, miseria, esplotación llaboral y ecolóxico, y sangre. En definitiva, nun ye más qu’un reflexu de lo que mos ufierta’l sistema capitalista, y ye por ello que insisten na necesidá hestórica de superar dichu sistema y avanzar haza la emancipación social y nacional.
La doble vertiente d’esta llucha reside en que nun ye namái un problema d’esplotación económico, sinon qu’estes multinacionales xueguen tamién un papel fundamental na globalización y la so uniformización cultural. Asimilar estes marques y los vezos implícitos a elles supón avanzar haza la muerte de la diversidá cultural n’Asturies y el restu’l mundu.

Y ven como única forma d’acabar colos atropellos empresariales haza la clase trabayadora asturiana, qu’esta algame’l control de la economía y, por estensión, del poder políticu. Asina camudar paru por trabayu, miseria por bientar, esplotación por igualdá y caltenibilidá; ya uniformización por diversidá y autoestima como pueblu.

Si nun respeten los drechos básicos y zarren la factoria de Cualloto ¡NUN BEBAS COCA COLA!