L’agrupación local de la coalición llamenta que na última visita de la Ministra de Mediu Ambiente nun se tuvieren en cuenta “verdaes incómodes”, como l’usu descomanáu d’agua potable, pa valorar la necesidá o non de nuevos banzaos.

L’Ayuntamientu tien un grupu de furgonetes dotaes d’un equipu pa la llimpieza con agua a presión que marafundia l’agua potable pa la llimpieza de les cais.

Dende l’agrupación d’Uviéu d’UNIDÁ considérase que la visita que fizo va poco la Ministra de Mediu Ambiente foi una oportunidá perdida pa plantegar les verdaderes cuestiones sobre les que tien de falase, si ye que de verdá hai interés más allá del de la propaganda, por intentar aforrar nún de los bienes más preciaos y escasos de la humanidá, en cuenta de xenerar infraestructures que nun faen falta, como’l banzáu de Caliao.

Demientres que l’alderique sobre la xestión del agua tea centráu nel cálculu de les necesidaes d’abastecimientu que fae’l gobiernu, UNIDÁ llama al sentíu común y pide que l’alderique se centre nes dixebraes alternatives qu’hai p’aforrar agua, pa que d’esti mou nun tengan qu’estudiase les “alternatives d’abastecimientu” de les que fala de contino la Ministra Narbona nes sos declaraciones en prensa. Nun sabemos qué alternatives son eses, qué ye eso del “as” guardáu na manga, pero ta claro qu’en nengún momentu se fala del aforru d’agua, asuntu cabezaleru si lo que se quier ye nun tener que llevantar un nuevu banzáu.

El Conceyu d’UNIDÁ d’Uviéu sobraya’l fechu de que’l nuestru ayuntamientu, lo mesmo qu’otres entidaes y empreses, fai un mal usu de la pallabra “ecolóxicu”, un términu aprovecháu pa tapecer l’auténticu marafundiu d’agua potable que faen de contino col preste de los organismos competentes na materia, como ye’l casu del Ministeriu de Mediu Ambiente, que nun s’esmolez pol gastu d’agua, sinón namái – paez ser – pol “abastecer les necesidaes”, por incoherentes que seyan éstes. Nesti sen, UNIDÁ camienta que nun ye’l momentu de “aselar” l’alderique sobre’l tema mediuambiental como diz el Ministeriu, sinón d’amosar tola so crudeza, yá que yá son a esgaya les agresiones permitíes por parte del estáu español, baxo una política que tien nicios que podríen definise como totalitarios; demientres que se fai un discursu ecoloxista de puertes pa fuera y se fala de “verdaes incómodes” a milenta quilómetros, la verdadera política enerxética que conderga a Asturies a ser el basureru d’Europa queda tapecida, fomentando amás un crecimientu urbanísticu descomanáu que se llevanta sobre los pegoyos de los campos de golf y les urbanizaciones ensin armonía nenguna col mediu que les arrodia, teniendo éstes amás unes necesidaes pergrandes d’agua.

Pa finar UNIDÁ reclama qu’Asturies asuma competencies nel estudiu pa la eficiencia enerxética y l’aforru de los recursos naturales, asina como un mayor protagonismu de los coleutivos ecoloxistes y los téunicos mediuambientales na busca de soluciones alternatives a siguir col esbarrumbe del nuestru entornu.