El Bloque felicita a Cataluña y Canaries pola prohibición de los espectáculos taurinos y va presentar na Xunta Xeneral una iniciativa pa qu’Asturies siga’l mesmu camín.

El Bloque por Asturies considera acertada y felicita pola decisión tomada ayeri, nel Parllamentu Catalán, d'abolir l'espectáculu taurín a partir de xineru de 2012, como asina tamién la prohibición d'esti tipu d'actividaes na comunidá autónoma de Canaries.

“Nenguna sociedá, que se llame civilizada y racional nestos tiempos, puede dexar la tortura, el maltratu, el sufrimientu y la muerte d'animales por fines recreativos, artísticos, d'ociu o supuestamente culturales o identitarios”, afirmen.

La organización nacionalista diz tener claro que la imaxinación del ser humanu ye lo suficientemente grande como pa xenerar elementos o señes d'identidá d'una comunidá que nun pasen pol maltratu y la tortura a nengún ser viviente.

El Bloque por Asturies, al traviés del so diputáu Roberto Colunga, va presentar na Xunta Xeneral del Principáu una iniciativa p'abolir les corríes de toros n’Asturies.