Nel so análís pa «El País» sobro la final del Mundial de fúbol, Ernesto Valverde resumía de manera brillosa'l fenómenu del cefalópodo Paul: «Cuando Charls Darwin escribió `L'Aniciu de les especies quedó curtiu. Sieglu y mediu dempués de la so espublización, los seres humanos de tol planeta entrugar a un pulpu, sí a un pulpu, quién va ganar un partíu de fúbol. ¡Y atina! Nin el mismísimu Darwin podía imaxinar que la evolución animal, o la involución humana, llegara a tantu». Los artículos de Valverde amosaron que nun sólo sabe enforma de fúbol, sinón qu'amás escribe realmente bien. nun ye l'únicu. El pasáu Mundial foi tamién un mundial de periodismu nel que les maneres a esgaya qu'esisten de concebir el fúbol y la lliteratura competíen ente elles. Nel casu de los agnósticos llibros clásicos como «Fiebre nes grades» de Nick Hornby o «Yo soi El Diego» de Maradona pueden ayuda-yos a averase a esti fenómenu de mases ensin enllordiase les manos.

Sía que non, si Maradona ye'l meyor xugador de la hestoria nun cabe dulda de qu'Eduardo Galeano ye'l meyor escritor sobro fúbol del mundu. Quiciabes, el meyor escritor en llingua castellana a seques. Durante los mundiales, Galeano zárrase na so casa de Montevideo y escolinga na puerta un cartel que diz: «Zarráu por fúbol». Una vez terminada la competición, escribe un nuevu capítulu pal so llibru «El fúbol a sol y solombra», obra mayestra de la lliteratura sobro'l deporte rei. Enantes de la cita mundialista, Galeano ufiertó una entrevista al diariu arxentín «Página 12» (2010-6-7) na que cuntaba que cuando yera mozu dirixió'l diariu «Dómina», un periódicu independente d'esquierda. Galeano recordaba que nos conceyos el puntu más duru yera defender les páxines sobro fúbol, al que calificaben como «l'opiu de los pueblos». L'escritor uruguayu critica ferozmente la industrialización del deporte, pero defende'l so valor intrínsecu en tantu ye un xuegu y sigan esistiendo xugadores.

Como se suel dicir, lo malo nun son les drogues, sinón l'usu que faigamos d'elles. Y la calidá de lo que se consumamos. Cola lliteratura y el fúbol asocede lo mesmu.