Hai que recordar que'l sumariu contra Udalbiltza, pol que ventidós ciudadanos y ciudadanes vasques tán llamaes a dir güei a l'Audiencia Nacional so l'amenaza de perdures penes de cárcel, ye parte d'una estratexa diseñada pol PP, que gobernaba en Madrí nel momentu en que la doctrina de «tou ye ETA» empecipió a aplicase a tou tipu d'asociaciones y entidaes polítiques, sociales y culturales vasques. El Gobiernu de Rodríguez Zapatero llegó al poder defendiendo que nel mundu podía haber coses que nun fueren ETA, pero llueu asumió'l legáu qu'en forma de macrosumarios contra organizaciones polítiques, medios de comunicación y asociaciones varies dexó-y José María Aznar.

Cada unu d'esos macrosumarios tenía una o delles carauterístiques que la facíen particular y de la mesma particularmente grave dende un puntu de vista democráticu y xurídicu: afectar a derechos fundamentales como'l de la llibertá d'espresión, basase en declaraciones llograes so tortures, suponer un ataque contra'l euskara, traer la criminalización de tou un sector social como ye la mocedá... La particularidá del xuiciu contra Udalbiltza ye que se xulga a electos pol llabor política y pública que desenvolvieron en cumplimientu del so mandatu eleutoral. Coles mesmes, toos esos sumarios tuvieron un elementu de mancomún: la evidente motivación política d'estos xuicios y la vulneración de les garantíes mínimes qu'un procesu penal tien de tener nun estáu de derechu.

Los electos y representantes d'Udalbiltza que se van sentar güei nel banquín de los acusaos en Madrí defendieron públicamente la construcción nacional de la nación vasca, y por eso xúlguenlos. Encausalos por "terrorismu" diz enforma sobre la concepción política dominante nel Estáu español. Amuesa la so obsesión pola destrucción frente a, por casu, el deséu de construcción de los pueblos vascu y catalán.