Cartes de la reciella a la conseyera d’Educación

Xunta moza llevará cartes d’escolinos que-y piden a Ana González poder estudiar n’asturianu

31 de xineru de 2013 DE 2013 • Glayiu

Güei xueves la organización de reivindicación llingüística Xunta Moza va presentar les cartes de los escolinos que-y piden a la conseyera d’Educación poder siguir estudiando Asturianu y n’asturianu. Va poco Ana González facía unes declaraciones nes qu’afirmaba que nun "hai demanda social pal asturianu", tras la casi desapaición de la llingua como asignatura cola reforma Wert.

La Xunta moza, estaya xuvenil de la Xunta pola Defensa de la Llingua asturiana, va presentar güei xueves a les 17:30 nel Rexistru del Principáu d’Asturies, n’Uviéu, les cartes que-y vienen escribiendo escolinos asturianos a la conseyera d’Educación, Cultura y Deportes, Ana González, lluéu de qu’esta dixera que l’Asturianu nun diba tener mayor presencia nel nuestru sistema educativu porque "nun hai demanada social" pa ello.
Xunta Moza afaló al profesoráu a que pidieran a los y les escolinos qu’escribieran una carta a la conseyera desplicándo-y por qué estudien la llingua y por qué debiera continuar esistiendo una asignatura d’Asturianu con una presencia digna nel curríuculu escolar.
De magar la llei Wert la llingua asturiana desapaeció dafechu d’ente les asignatures a cursar pol alumnáu asturianu, al nun tener calter d’oficial y nun poder contar con una especialidá propia. Lluéu d’una movilización integral del movimientu de recuperación llingüística, dende l’Academia de la Llingua asturiana hasta los sindicatos de profesores, la consera tuvo una reunión col ministru d’Educación y tornó de Madrí afirmando que l’Asturianu volvía a tar ufiertáu dientro del sistema educativu del Principáu. Sicasí, arreciaron les crítiques a estes declaraciones, puesto que súpose darréu que l’asignatura de llingua asturiana diba perder presencia en categoría y en hores d’aprendizaxe. Anguañu l’Asturianu tien calter voluntariu na educación primaria y voluntariu en secundaria. Cola reforma que trae’l ministru Wert, dambes estayes de la educación van ufrir l’Asturianu como opcional, lo qu’amenorga les hores llectives selmanales, y pon a la llingua a competir con otres asignatures optatives como Francés, Música o Tecnoloxía.
Agora entama otra fase de movilización pola presencia digna del asturianu nel sistema educativu.