Cangas movilízase pol futuru de la minería del carbón

Trescientes persones aconceyen en Cangas del Narcea en sofitu al futuru de la comarca

14 de febreru de 2013 DE 2013 • Glayiu

Unes 300 persones respondieron a la llamada de los mineros del carbón de la cuenca del Narcea, y apoyaron les sos desixencies d’un plan de viabilidá pa les mines del suroccidente y, con ello, un futuru pa la comarca. A diferencia de les cuenques del Caudal y del Nalón, nel suroccidente la minería ye privada, y ta mayoritariamente en manos del controvertíu empresariu Victorino Alonso.

Varios centenares de persones diéronse cita na Plaza l’Ayuntamientu de Cangas pa reclamar que’l previsible pieslle de les esplotaciones carboníferes nun condene a la emigración a la población del conceyu. La mayoría de les mines de Cangas del Narcea y del suroccidente asturianu son propiedá del mayor empresariu priváu del carbón n’España, el controvertíu Victorino Alonso. Segundo Menéndez, representante de la sección sindical de la Corriente SIndical d’Izquierda na minería del Narcea, afaló a los presentes a dar batalla pol futuru de los puestos de trabayu y con ello, de la sobrevivencia de la comarca.

En defensa la mineria na comarca de Cangas de Narcea

La minería privada tampoco queda al marxe de los retayos presupuestarios a la industria del carbón. La minería sigue teniendo un pesu perimportante na vida económica de la comarca del Narcea, y como denunciaron los concentraos ayeri, "pesllar la minería significaría condenanos al desempleu y a la emigración".
Garraron la pallabra diferentes personalidaes, que defendieron la viabilidá del carbón y emplazaron a los presentes a nun se rendir al rodillu de los recortes económicos y dexar morrer la comarca del Narcea ensin gurgutiar.