Bildu, CUP y SAT, toos queremos ser como ellos (con perdón)

3 de avientu de 2012 DE 2012 • Nacho Muñiz

Ensin dulda estos trés son, pa munchos, los nuesos referentes políticos nel Estáu. Espero que non pol so "ésitu", sinón pola so coherencia y la so capacidá d’adaptación.
Esto últimu, la nuesa falta de capacidá d’adaptación, ye posiblemente ún de los mayores defectos de los asturianos y, quiciabes por ello, tendemos a idealizar y simplificar les lluches d’otros coleutivos/pueblos hasta’l ridículu, intentando treslladar les sos formes, evidentemente, ensin ésitu.

Por casu EHBildu, y la so capacidá p’axuntar a tola esquierda vasca nunes sigles.
Nun hai que ser bien mayor pa recordar dos o tres campañes pa consiguir lo mesmo na asturiana, la famosa "xuntanza". A la fin fallaron delles coses: Andecha nun ye la Esquierda Abertzale, Bloque-UNA nun ye Eusko Alkartasuna y los interlocutores asturianos nun son Otegi y Cia. Nun falo en sentíu peyorativu, ye que nun lo son.
Amás nun dexa de ser curiosu que la "xuntanza", les sos xuntes y grupu promotor, llevaren la tema con más secretu que les xuntes d’ERC con ETA. Asina ye que entá güei lo que se sabe d’elles ye por rumores d’internet y dalgún artículu-dardu cuando les negociaciones rompieron... colo fácil que ye faer una acta y espublizala pa que caún tenga la so opinión... pero non, si tenemos que copiar daqué de los grandes partíos que sía lo malo, como’l secretismu.
A la fin, lo de siempre, nada de nada y, yo imaxínolo asina: daquién llevántase y diz: "¿Por qué nun nos refundamos? Yá sabéis, un nuevu logotipu, otru nome... de xuru qu’asina trunfamos", y ye que n’Asturies un diseñador de logotipos de partíos podría ganase la vida con ello si-y pagáren. Pero nada, 30 años de "xuntances", nuevos partíos, rerefundaciones, etc... ya increíblemente nun llogramos nada. Eso de "intenta caminar en llinea recta y vas ver como a la fin llegues" tien de ser mentira. O quiciabes yera al aviesu.

Depués tán les CUP. El trabayu nos movimientos sociales, qu’apocayá-yos dio 3 diputaos nel parlamentu catalán. Equí creo qu’el nuesu problema ye de léxicu. Nun ye lo mesmo trabayar "en" que trabayar "con".
Ye raru’l militante catalán qu’amás de la so militancia n’Arran, CUP o Endavant nun milita nun casal, una asociación de vecinos o una asamblea de barriu del 15M. N’Asturies sicasí trabayamos "con". Vamos participar en nome del nuesu colectivu o partíu. Puede paecer lo mesmo, pero nun lu ye, y la xente nun te ve igual.
N’Asturies tenemos una formula, autóctona, llamada Conceyu Abiertu nel que s’inspira’l nuevu partíu políticu nacíu de les cenices d’Andecha. El problema ye que si queremos ser un Conceyu Abiertu tenemos que ser eso, abiertos.
CUP-AE ta sofitada por coleutivuos como En Lluita, abiertamente federalistes y non independentistes, el trucu ye llegar a unos puntos mínimos aceptables. (Nun escaezamos que yá se llogró daqué paecíu nuna candidatura xixonesa que fracasó más poles sos formes que pola idea.)
La CUP nun cuerre, nun aspira a ser "puru", tienen el valor de convocar asamblees abiertes pa determinar si tienen de presentase o non onde xente, non militante, averóse a pidi-yos que lo fixeren y que’l so discursu fuera 100% social. Nun arrenunciaron a lo que contitúi el cogollu de la CUP, la construcción d’unos PP.CC. llibres y socialistes, pero fuxeron, sicasí, del oportunismu de Solidaritat Catalana per la Independència ("llogremos una mayoría parlamentaria y declaremos la independencia") o del idealismu d’otros que cada vez que se convoquen elecciones considérenles les más importantes de la hestoria. Presentáronse como lo que son, los d’embaxo que tanto repite’l 15M, embaxo a la izquierda, bien a la izquierda, pa sirvir d’altavoz de los mmss onde participen los sos militantes y simpatizantes.
Con esto quiero dicir que nun basta con formar una asamblea del to partíu nel to conceyu. Hai qu’ufiertalo a los movimientos sociales como plataforma pa faer llegar la so voz. Y ufiertar nun ye "si salimos escoyíos vamos llevar les vueses propuestes al conceyu" sinón consiguir integrar a xente independiente, y con carisma, nes llistes. Nun escaezamos que ye una candidatura coles mires de llevar les reclamaciones de los vecinos al conceyu, va ser lóxicu pos, qu’ellos formen la llista.

Depués ta’l SAT, los nuesos hermanos andaluces.
Toi convencíu que si dalgún día llega un cambéu, un movimientu políticu fuerte al nuesu país, va ser por aciu la CSI. Ye’l colectivu más grande, con más sofitos, meyor consideráu... pero a día de güei asítiase en tierra de naide. Ye verdá que nun ye un sindicatu típicu y que s’implica como naide nes lluches sociales pero n’otros aspeutos la so visión del sindicalismu ta hipertrofiada. Voi poner l’exemplu que siempres pongo: tenemos una llei llaboral. El gobiernu anuncia una reforma llaboral. Manifestámonos en contra. Fracasamos total o parcialmente y el gobiernu aprébala. Al añu siguiente’l gobiernu anuncia una nueva reforma. Defendemos quedanos como tábemos, esto ye, quedanos cola reforma contra la qu’en principiu tábemos en contra. Y vuelta empezar.

Esto nun quier dicir que’l sindicatu dexe de defender a los trabayadores, que para eso ye un sindicatu, cola llei na mano porque tamos en contra de la reforma sinón qu’ensin la toma de poder, ensin el control de les decisiones nes nueses manos, el nuesu trabayu ye de baldre. Como Matrix col escoyíu, pa que mos entretengamos con una llucha que nun tien final.

Asina, los nuesos sindicatos hermanos SAT o LAB sí lo tienen claro y unu sofita a Bildu y l’otru creóse’l so propiu partíu, hasta agora, federáu n’IX. Evidentemente nun voi negar que los contestos hestóricos y la falta d’un referente políticu qu’escarecemos n’Asturies inflúi, pero ye que tampoco-y lo punximos bien fácil con tanto micropartíu. Pero, a nuevos tiempos, nueves formes y nun puedo evitar pensar que gran parte del trabayu de la CSI eslleise al nun tener un referente políticu y que l’únicu sindicatu que camudó un país foi Solidaridá en Polonia, col sofitu de la CIA, y nun foi pa meyor que digamos.

Supongo que daquién m’acusará d’electoralista pos paez qu’escontra eso esta enfocáu este artículu pero curiosamente fai más d’una década que nun participo en nengún partíu pero si en movimientos sociales, sindicales, antirrepresivos o antiracistes y públicamente sofito toa forma de llucha, non solo la electoral, antirrepresiva o que traigan una meyora na calidá de vida de les clases populares asturianes y del mundu.

La verdá ye que tres casi dos años migráu, y puteáu, en Barcelona y Alemaña, veo dende l’alloñanza cómo caltenemos la nuesa pureza revolucionaria ensin la más mínima meyora pa consiguir recuperar el nuesu país. Ye fácil cuando tienes un trabayu na to tierra, o una familia que te pue ayudar, ser el más gallu de la corrolada, pero dalgunos naguamos por volver porque se ta construyendo una nueva Asturies na que los migraos tenemos sitiu, non a tirar piedres una vegada al añu a los antidisturbios ensin tener nada que comer.

Hai que ser pragmáticos señores, y consiguir tomar les sos propies ferramientes contra ellos, yelo. Sinón entruga a un trabayador de Marinaleda, al desagospiáu en Gernika al que’l conceyu pagó-y la hipoteca y déxa-y siguir viviendo na so casa en cuenta de un dineru mínimo o al del pueblu gobernáu pola CUP que siguen calteniendo una xestión pública del agua, si prefieren vivir so la mordaza del PPSOE rezando porque llegue una revolución.

Creemos daqué, daqué lo suficientemente potente pa camudar Asturies. Pero pa ganar, ¡coime!, que yá ta bien de danos palmadines nel llombu porque se consigue frenar un despidu o un desahuciu cuando esi mesmu día na Xunta decídese’l despidu de cientos de trabayadores de salú, educación o la vienta de vivienda pública a dalgún especulador. Y si, puede faese les dos coses, tar na manifestación y depués faer una llei que torgue qu’eso pase. Porque ye mentira que ye más revolucionariu’l que ta tolos díes tres una pancarta qu’el que fai que la manifestación nun sía necesaria. Porque nun se gana oponiendose a tou, hai que trazar un plan, hai que dicir lo que se quier. Hai que saber l’Asturies que queremos en trabayu, ecoloxía, pesca, caza, mines, enerxía, educación, llingua, museos, tresporte, vivienda, muyeres, vieyos, migrantes, pueblos, ciudaes, democracia participativa, xusticia, moneda... y esto solo faise ente toos.

"Lluchar (militar, participar), crear (nuevos caminos), construyir unidá popular (con arrogancia)"