Asturgold lleva la Bullada Purpurina

El galardón negativu qu’apurre la Coordinadora Ecoloxista d’Asturies va pa la empresa minera del oru

1u de xineru de 2013 DE 2013 • Glayiu

Dende hai 20 años la Coordinadora Ecoloxista d’Asturies fixo entrega simbólica, el pasau 28 d’avientu, día de los Santos Inocentes, de la Bullada Purpurina. Con esti galardón negativu pretenden reconocer a empreses, instituciones y alministraciones que más destacaron pol so llabor contra’l mediu ambiente asturianu. Esti añu el reconocimientu antiecolóxicu foi pa la empresa Asturgold, responsable del proyeutu de mina d’oru en Salave, Tapia de Casariego.

Anguaño, d’ente les candidatures propuestes destacaben la Conseyera de Agroganadería, HidroCantábricu, Victorino Alonso, Cogersa o Asturgold. lnda cuando hai que resaltar que toes elles obraron abondosos méritos pa trunfar, finalmente’l xuráu falló en favor de la empresa Asturgold.

La empresa minera, encargada de desendolcar la mina d’oru en Salave, adquirió la concesión del Rió Narcea Gold Mines y plantegó la esplotación de la mina “a cielu abiertu”, con una planta de cianuración, porque dicía que la soterraña yera invidable económicamente. En recibiendo les primeres oxeciones, camudó’l proyectu de “a cielu abiertu” a soterrañu, ensin esplicar por qué-y salen agora les cuentes d’esti tipu d’esplotación.

Amás cuando la empresa llegó a Asturies, faló de miles de puestos de trabayo qu’adulces foi amenorgando y a día de güei fala de 250 que se seguiran amenorgando si’l proyectu nun trai’l tratamientu de cianuración.

A la Coordinadora Ecoloxiste paez-y sorprendente que’l Principáu, autorice la esplotación de la mina soterraña, ensin que la empresa esplicara cómo y ónde va dar en tratar el mineral, pos nun s’hai d’escaecer que se trata de recuperar menos d’un gramu d’oru per tonelada, y que caúna d’eses tonelaes ser de borrafa. Nel últimu proyectu presentáu, les balses de borrafes trataes ocupaben 500.000 m2 con un altor de 23 m.

Dende’l coleutivu ecoloxista esperen y deseyen qu’esti galardón" espierte de la febril ceguera a les distintes alministraciones que dexen que meyora esti esbarriáu proyectu mineru que los sos impactos pueden ser una hipoteca pa los conceyos de Tapia, Franco y el Castropol.