Aponderamientu de la Llucha Minera

11 de payares de 2013 DE 2013 • Glayiu

El vienres 15, nel Atenéu de Turón, y el sábadu 16, na Casa de Cultura Teodoro Cuesta de Mieres, los hermanos Javier y Alberto Fernández Catalán van facer la estrena del documental “Elogio de la lucha minera”, rodáu va pocos meses nes cuenques mineres.

El documental presenta un percorríu hestóricu qu’aporta hasta los enfrentamientos d’anguañu. Dende la llucha escontra la misera hasta la so llucha diaria escontrra la muerte y la explotación. Los mineros xubilaos, los hestoriadores de les cuenques y los mesmos mineros mozos que quieren ocultar la so identidá ante la cámara, relaten en primera persona la emoción y rebexina cola qu’observen la desolación de les cuenques mineres anguaú, la destrucción de les infraestructures mineres, los derechos polos que llucharon y los puestos de trabayu.
Un documental que nun afronta’l problema de la minería dende’l puntu mira de les discusiones d’avezu sobre’l sector. Con mui pocu tiempu y bien de pocos medios, Demos2Art presenta un trabayu que namás aspira a ser testimoniu d’una existencia castigada deceniu tres de deceniu, y la dignidá de la so resistencia.
En mayu de 2012, el Gobiernu d’España anunciara drásticos recortes nes axudes estatales a la minería. El sector del carbón llevantóse. Sucediéronse manifestaciones, barricaes y encierros nos pozos mineros a lo llargo de tol branu. Dende les diferentes cuenques mineres, dellos grupos de mineros marcharon a pie a Madrid. Hubo duros enfrentamientos cola Policía y la Guardia Civil en carreteres, pueblos y ciudaes de les cuenques mineres.
En xunu, durante una selmana, l’equipu de Demos2Art desplazóse a les cuenques mineres d’Asturies cola idea de rodar imáxenes impactantes de la llucha minera. Ensin malapenes medios, nin tiempu, nin contactos. Ensin guión y ensin producción. Cola intención de que la cámara marcara’l camín a siguir. D’esta manera, yá nel primer día de rodaxe, alcontraron aquello que quedaba tapecío a los güeyos de los espectadores de les escenes de violencia: la experiencia de los seres humanos qu’entregaben l’aliendu a la llucha minera, la so desolación, les sos poques esperances de victoria, el so gritu a la sociedá pa que nun escaecieran la so llucha, pa que la continuaran. Entós decidieron que la cámara siguiera’l so camín, más calmu y menos espectacular, más dramáticu y desconocíu.
Demientres nes autopistes y los pueblos sucedíense les engarraces, dellos mineros xubliaos y hestoriadores de les cuenques mineres contaron les sos experiencies y sabiduríes a cámara, dando sentíu a la batalla, pal so país y tamién pal restu de la sociedá.

Facebook: https://www.facebook.com/ElogiodelaLuchaMinera