Apagón na alta tensión: la crisis aparca los proyectos p’Asturies

30 de xineru de 2013 DE 2013 • Glayiu

El gobiernu central aparcó la execución de les llínees d’alta tensión p’Asturies . El BOE espublizó’l llistáu d’infraestructures de la Planificación d’elletricidá y gas 2008-2016 y n’elles nun consten los proyectos de les llínees d’alta tensión "Costa Verde", "Sama-Velilla" y "Boimonte-Pezós".

D’alcuerdu a los planes del Ministeriu d’Industria, y pa enorme prestu de los grupos ecoloxistes, queden suspendíos temporalmente dellos planes d’alta tensión n’Asturies, según recuye’l Boletín Oficial del Estáu (BOE). La llínea d’alta tensión Costa Verde taba diseñada travesando’l centru d’Asturies, con un trazáu qu’afectaba a parroquies y vecinos de los conceyos d’Avilés, Gozón, Carreño, Xixón, Siero, Nava, Bimenes y Samartín del Rei Aurelio.

Les asociaciones que configuren la Plataforma contra la Llínea d’Alta Tensión "Costa Verde" manifestaron el so "enorme prestu ante la suspensión del proyectu, anque alverten que se van siguir "sollertes y con argumentos reforzaos ante la posibilidá de que dichu proyectu fuera recuperáu nel futuru".

Dende la Plataforma recuerden que "según el proyectu de Rede Eléctrica Española la llínea resultaba ser indispensable pa la seguridá del suministru elléctricu y agora queda demostráu que nun yera ciertu. Cuidao que según consta nel BOE la razón fundamental pa esaniciar instalaciones yá proxectaes foi la desestimación de la so utilidá".

Per otru llau la llínea Lada a Velilla ye un proyectu del que lleven mas de 22 años falando de la so imperiosa necesidá, y destaca que nesti tiempu Asturies nunca dexara d’esportar enerxía elléctrica.

La Coordinadora Ecoloxista d’Asturies celebra que’l gobiernu dexe pa prau esta llínea y destaquen que paez que la mesma, defendida por Rede Eléctrica pa sacupar la enerxía xenerada n’Asturies nun cumple, a la vista de los informes, nengunu de los requisitos y la so execución queda paralizada.

El colectivu ecoloxista fixo saber que "la realidá paez que s’impon nesta llínea que naide quier en Llión y munchos nun la queremos n’Asturies; cuestiona los argumentos risibles qu’utilicen n’Asturies llamando al alarmismo como que si non se fai ponen en serio pelligro la seguridá de suministru a la Rede Nacional, que nos recuerda a otros ridículos utilizaos enantes pol actual conseyeru d’Industria, quien declaraba que si nun la teníemos, díbemos volver a les veles, o del responsable de mediu ambiente del PSOE, Hugo Morán, que dixo que si nun la facíen, nun podría funcionar l’Ave, si ye que dalguna vegada llega".

Dende la Coordinadora Ecoloxista d’Asturies siguen calteniendo que nun ye necesaria esta llínea pa nada pal futuru enerxéticu de Astuies.