Anuariu de la Música asturiana 2012

Goxe Producciones espubliza la nueva edición del almanaque de la música n’asturianu

19 de avientu de 2012 DE 2012 • Glayiu

Yá ta na cai l’Anuariu de la Música asturiana 2012. Con esti yá son trece númberos consecutivos que vienen editandose dende’l añu 2000. L’AMA nació col oxetivu de ser pa la música del país un órganu d’espresión, un escaparate onde amosar los sos llogros y esmoliciones. Espublizau agora por Goxe Producciones, el númberu d’esti añu fala sobre La Tarrancha, los 25 años de Dixebra, el Premiu al Meyor Cantar y tola producción musical n’asturianu. Pa afondar nél falamos con Xune Elipe, direutor de la revista y cantante del grupu Dixebra.

N’esta entrega l’Anuariu de la Música asturiana vien editau por un nuevu proyeutu, Goxe Producciones. Falamos con Xune Elipe, el so director, al que entrugamos cómo surde esti proyeutu: "Depués de la salida de L’Aguañaz de Publicaciones Ámbitu planteguémonos qué facer y cómo encarar el futuru. Entós decidimos apostar por una hestoria más completa qu’abarcare dellos campos d’acción. Asina surde Goxe Producciones, col enfotu de dir afitando pasín ente pasu una infraestructura de calter empresarial que tuviere a la llingua asturiana como elementu central. La nuestra intención ye trabayar n’estayes como la discográfica (enxertando L’Aguañaz nesti proyectu), l’audiovisual, radiofónica, editorial, etc. Queremos combinar la dimensión empresarial cola militante y dir creando industria cultural estable n’Asturies; somos conscientes de qu’esto va llevar tiempu, pero nello tamos".

El panorama cultural asturianu ta siendo retayáu; va pocos díes facíase publica la desapaición d’Ambitu y Les Noticies: "ye una noticia mui mala pa la llingua asturiana en xeneral, tan falta de visibilidá y d’espacios onde poder amosar les sos creaciones. Anque munches veces nun coincidiera cola so orientación política, Ámbitu fixo un llabor innegable por esparder el respetu y l’apreciu pol nuestru idioma en sectores de la sociedá y de los poderes establecíos qu’hasta entós nun se preocuparen del tema o taben directamente a la contra".

Nel AMA 2012 hai entrevistes a La Tarrancha, al grupu astur-chilenu de folk Ta Fechu o al músicu Pablo Canalís; un estudiu sobre polítiques musicales y alministración autonómica; cróniques de varios festivales, l’informe "Polítiques musicales y alministración autónómica"...

Dientro de los conteníos que vamos poder lleer nes 94 páxines de revista hai entrevistes a La Tarrancha, al grupu astur-chilenu de folk Ta Fechu o al músicu Pablo Canalís; un estudiu sobre polítiques musicales y alministración autonómica; cróniques de varios festivales; reportaxes fotográficos; un informe sobre la baxada de conciertos y la so repercusión ente los grupos del país; comentarios sobre los discos nuevos de Mariluz Cristóbal Caunedo, Toli Morilla o Soncai System; un reportaxe del trabayu Llume de Xera; artículos d’opinión, y reseñes de lo más destacao nel panorama musical asturianu del añu que tienen a la música tradicional asturiana o cantada n’asturianu como protagonista.

Asina, xunto cola revista regálase un cedé tituláu Esbilla sonora 2011-2012 que contién ventidós temes repartíos por estilos, faciendo repasu de les grabaciones más importantes d’esi periodu, con grupos y artistes como Mariluz Cristóbal Caunedo, Anabel Santiago, les bandes de gaites Camín de Fierro y Llariegu, Tuenda, Pandereteres de Fitoria, Asturiana Mining Company, Tejedor, Ta Fechu, Toli Morilla, Alfredo González, Soncai System, La Tarrancha, Fala Non Caduca, Dixebra o la Big Band de Xixón.

Esti añu la banda avilesina Dixebra fizo venticinco años enriba los escenarios, polo que nel AMA faen un reportaxe fotográficu bien curiosu. Entrugámos-y a Xune si ve relevu xeneracional na música asturiana: "Tengo l’enfotu de que sí, pero nos últimos años ta produciéndose un parón preocupante nel surdimientu de grupos o proyectos nuevos, a veces tengo la sensación de que somos un piñu reducíu de persones les que dinamizamos el nuestru panorama sonoru. Lo bono ye que’hai una escena musical asturiana con cierta estabilidá y producción, lo malo que nun apaecen nomes nuevos que la remociquen; espero que seya namás un ciclu y que dientro d’un tiempu podamos falar d’otra situación".

Sobre si la música asturiana cuenta col respaldu y el sofitu necesariu, Xune tienlo bien nidio: "Non, rotundamente non. Namás hai que ver la presencia que tien nos medios públicos, más bien escasa y mui orientada hacia la tradición, ensin espaciu practicamente pa les propuestes más contemporánees. Nel informe qu’incluimos nel Anuariu tituláu "Polítiques musicales y alministración autónómica" pue vese, oxetivamente, cómo los responsables políticos del nuestru país desdexen esti aspectu tan importante de la creación artística asturiana".