Ante la prohibición del’actu d’alcordanza de la declaración de soberanía de 1808

1u de xunu de 2014 DE 2014 • Glayiu

La Xunta Eleutoral prohibió l’homenaxe de #LluchandoPolaSoberanía a los fechos revolucionarios del 25 de mayu de 1808 n’Asturies mentanto permitía actos institucionales nos que rescamplaba una falta de discursu políticu total.

La iniciativa #LluchandoPolaSoberanía denuncia la prohibición por parte de la Xunta Electoral, la Delegación del Gobiernu español n’Asturies y la Policía, de la concentración d’alcordanza de los fechos de Mayu de 1808, convocada pal pasáu sábadu 24 a les 12:30 énte la Xunta Xeneral.

Queremos denunciar el calter antiasturianu de la Xunta Eleutoral, al politizar electoralmente un actu, que na práutica nun tien que ver coles eleiciones. Amás, nun ye la primer vegada qu’esti muérganu eleutoral censura o remprime n’Asturies, torgando n’anteriores ocasiones l’emplegu de papeletes en llingua asturiana. Nesi sen, afitamos que l’envís de la convocatoria yera reivindicar la soberanía popular, la voz del pueblu qu’anguaño ta secuestrada por esti réxime profundamente antidemocráticu.

Consideramos que los responsables de la prohibición de la concentración tan pisotiando drechos fundamentales, como’l drechu d’aconceyamientu y de manifestación. Nun se nos comunicó per escrito la prohibición, con llamaes amenazantes a persones convocantes alvirtiendo d’un supuestu delitu en casu de realizase la convocatoria.

Esta iniciativa reivindicativa #LluchandoPolaSoberanía cunta col sofitu tanto de persones individuales, como de dellos coleutivos como ye’l casu d’Andecha Astur, Compromisu, Conceyu Abiertu, Corriente Sindical d’Izquierda, Darréu, Espaciu La Llegra y Xunta Estudiantil Asturiana.

Porque tamos fartes de represión, ¡nun van ser quien a paranos!
Vamos siguir lluchando pola soberanía ¡Puxa Asturies llibre y soberana!