Alcuentru Asturies-Euskal Herria

21 de febreru de 2013 DE 2013 • Glayiu

Dellos aspectos de la realidá asturiana van aportar a Gasteiz nuna xornada sociocultural internacionalista. El dos de marzu va cellebrase esta “Topaketa/ Alcuentru Asturies-Euskal Herria” qu’axunta delles actividaes pa hermanar a los dos pueblos. Pasucais, xinta popular, mercadín de colectivos asturianos, mesa redonda, conciertu ska La Tarrancha y Skakeitan y una folixa internacionalista, van ser les actividaes d’esta xornada entama por Ixuxú.

Dar a conocer estremaos aspectos de la realidá asturiana n’Euskal Herria y enachar llazos ente persones y colectivos sociales y culturales de los dos países, ye’l oxetivu de la “Topaketa/Alcuentru Asturies-Euskal Herria”. Esta xornada sociocultural va cellebrase en Gasteiz el próximu 2 de marzu y nella va haber actividaes rellacionaes con Asturies dende pela mañana hasta la madrugada.

Trikigaita poteo (pasucais per chigres animáu con trikitixa y gaita), xinta popular, mercadín de colectivos asturianos, una mesa redonda entitulada “Asturies existe y resiste: luchas y movimientos sociales en Asturies” –que va xirar alrodiu’l movimientu sindical, el de reivindicación llingüística y el nacionalismu y la izquierda soberanista-, un conciertu ska del grupu asturianu La Tarrancha y de los donostiarras Skakeitan y una folixa internacionalista van ser les actividaes del día.

L’eventu ta entamáu a comuña por Ixuxú Asturies-Euskal Herria elkartea, un proyectu de reciente creación que tien por oxetivu averar la so realidá asturiana a Euskal Herria; el Centru Social La Semiente, un centru social autoxestionáu asitiáu na población minera asturiana de L’Entregu; y el Gaztetxe de Gasteiz, nel que van desendolcase toles actividaes sacantes la mesa redonda, que va ser nel Zapateneo.

La “Topaketa/Alcuentru Asturies-Euskal Herria” ye una xornada que recueye’l testigu d’otros actos internacionalistes y de solidaridá ente estos dos pueblos, como la “Folixa Asturiarra” que se facía nel Gaztetxe d’Erromo. Nesta ocasión, tamién va llegar a la capital alavesa un autobús organizáu dende Asturies.

Programa
13.00| Bienvenida al bus qu’aporta dende Asturies y trikigaita poteo pel Cascu Vieyu
15.00| Xinta popular [preciu: 5 €]
17.00| Mercadín de colectivos asturianos: sindicales, antirrepresivos, en defensa de la llingua asturiana, radios llibres, xuveniles, antifacistes, musicales, centros sociales…
18.00| Mesa redonda “Asturies existe y resiste. Lluches y movimientos sociales n’Asturies”:
· Introduz y modera
Miguel Rodríguez. Militante del Centru Social La Semiente
· Sindicalismu de clase y lluches sociales
Paco Iglesias. Militante de la Corriente Sindical de Izquierda (CSI)
· El movimientu de reivindicación llingüística
Llucía Menéndez. Militante de la Xunta Pola Defensa de la Llingua Asturiana
· Nacionalismu y izquierda soberanista asturiana. Pasáu, presente y perspectives de futuru
Iyán González. Militante independiente de la izquierda soberanista asturiana
21.00| Conciertu [preciu d’entrada: la voluntá]
· La Tarrancha
Ska-fusión dende Asturies, presentado’l so nuevu discu “Mezigayuska”
· Skakeitan
Ska-rock dende Donosti, presentando’l so nuevu discu “’Ahots gabekoen ahotsa”
00.00| Folixa internacionalista

Toles actividaes son nel gaztetxe sacantes la mesa redonda, que va ser nel Zapateneo

Entama. Ixuxú Asturies-Euskal Herria elkartea / Gasteizko Gaztetxea / C.S La Semiente

Sofita. Hala Bedi Irratia / Gazteiraultza.info / Glayiu.org