Alambique acusa al Ayuntamientu de Castrillón de frayar los derechos sociales

14 de febreru de 2013 DE 2013 • Glayiu

L’Ayuntamientu de Castrillón fraya los derechos sociales de los vecinos, en pallabres de l’asociación contra la esclusión Alambique, al nun tener programes de vivienda que garanticen qu’en situaciones d’emerxencia les persones puedan aportar a una vivienda.

Dende l’asociación contra la esclusión Alambique, denuncien esto porque una vecina del conceyu, que ta a puntu de ser desahuciada de la so casa por non tener recursos económicos pa poder pagar la delda acumulada, nun recibe ningun sofitu per parte del Ayuntamientu por considerar que "nun tien una situación de necesidá".

Esta vecina vive con 426€ de Renta Activa d’Insertamientu que termina’l mes de mayu, y lleva a la espera de resolvimientu del Salariu Social dende va meses. Yá nun ye solo la situación d’emerxencia que vive na actualidá, sinón que lleva cinco años enzarabeyada nel llaberintu burocráticu de los servicios sociales del Ayuntamientu.

Por tou ello l’Asociación contra la esclusión Alambique, entiende que l’Ayuntamientu de Castrillón ye unu de los responsables directos d’esta situación xunto cola Conseyería de Bienestar Social, y tan llevando a cabu una campaña de solidaridá con Lourdes, y llamen a la ciudadanía a participar el miércoles, 20 de febreru a les 19:00h., día de la Xusticia social, nuna concentración delantre del Ayuntamientu de Castrillón.