Al alcalde de Noreña nun-y presta l’asturianu

El socialista César Movilla, rexidor de Noreña, torga otra vegada la presentación de documentacion municipal n’asturianu

25 de xineru de 2013 DE 2013 • Glayiu

L’alcalde de Noreña, el socialista César Movilla tien mala memoria. Magar que nel so programa elleutoral llevaba la promesa de "Potenciar la normalización del asturianu", pocos meses depués de llegar a l’alcaldía la so corporación vien de refugar por dos vegaes solicitudes de documentación presentaes pola agrupación local de Conceyu Abiertu porque han de "presentarlos en lengua castellana".

La falta d’un estatus llegal curiosu qu’afite l’usu y normalización de la lingua asturiana en tolos ámbitos ye la consecuencia directa de situaciones como esta. Magar qu’esiste una Llei d’Usu del bable/asturianu qu’ampara en teoría la utilización de la llingua propia d’Asturies nes estayes almistratives y públiques en xeneral, l’incumplimientu de dicha normativa nun conlleva consecuencies llegales o punibles de nengún tipu.
Asina topamos situaciones como la qu’asocedió nuevamente nel conceyu Noreña. L’alcalde socialista Cesar Movilla devolvió por dos vegaes les solicitudes de documentación del conceyal de Conceyu Abiertu por Noreña, Pablo Pérez Fonseca, por tar escrites n’asturianu. "Los testos son dafechamente entendibles y cenciellos, simplemente se trataría de dar el so consentimientu pa que se facilite al nuestru Grupu Municipal una copia de los documentos pedíos", dicen dende la formación soberanista de Noreña.

JPEG - 53.7 KB

La falta d’apreciu al asturianu, a la pallabra dada y a la llegalidá vixente por parte de corporación municipal socialista en Noreña parez nidia abondo, si mos decatamos que nel so programa elleutoral pa los comicios municipales, na estaya de "Cultura y Patrimonio" la candidatura de Movilla apostaba por "Potenciar la normalización social del asturiano". De puertes del so ayuntamientu pa fuera, debemos entender. "Faise necesario reaniciar la busqueda d’una formula que permita aprobar una midida nel ámbitu municipal, que solucione esta grave discriminación que prohibe de facto, por causa de la nula voluntá de los gobernantes, l’usu escritu del asturianu, solo faltaba que nos prohibiere falar", afirmen dende Conceyu Abiertu.

DOCUMENTOS