ADEPAVAN contra ’les marques blanques’ empresariales

7 de abril de 2013 DE 2013 • Glayiu

L’asociación de paraos del Nalón criticó con dureza la cellebración de les xornaes "empleat 4x4" en Sama de Llangréu y Samartín del Rei Aurelio, iniciativa de la Asociación de Jóvenes Empresarios y la Fundación Botín, venceyada al Banco Santander, por ser "marques blanques de grupos financieros. Los paraos y la patronal nun remamos na mesma direición pa salir d’esta crisis".

La iniciativa “emplea-t 4x4” ta entamada pola Fundación de Jóvenes Empresarios y la Fundación Botín cola collaboración de los ayuntamientos de Llangréu y Samartín del Rei Aureliu, col enfotu de “conectar a tolos axentes implicaos na recuperación del mercáu llaboral", en pallabres de los organizadores.
ADEPAVAN (Asociación de Paraos del Valle del Nalón), "como asociación representativa de los parados de la comarca", amuesó el so rechazu a participar en nengún actu venceyáu a organizaciones empresariales o a marques blanques de grupos financieros (Fundación Botín)". Los paraos atalanten que "l’actual situación económica y llaboral nun ye responsabilidá del trabayador activu o desempleáu, sinon d’un modelu económicu qu’incentiva la másima ganancia empresarial nel mínimu tiempu". Poro, afirmen que "nun aceptamos la recuperación del mercáu llaboral nos términos que nos ufre la patronal nin los diferentes gobiernos socialista o popular, basaos en recortes salariales, precariedá llaboral o desaniciu de derechos sociales. Vemos como traten de sobrevalorar al ’emprendedor’ infravalorando al trabayador por cuenta ayena. Los diferentes cursos de ’reciclaxe’ y adaptación profesional ponen en duda profesiones y oficios forxaos durante toa una vida llaboral. La orientación a la búsqueda d’empléu, allarga l’agonía de quien sabe que nun va topar trabayu nun momentu de la producción en que nun esiste producción. Observamos con preocupación la tendencia de culpar al paráu de la so propia situación y el dañu psicolóxicu que remana nel nuestru colectivu les continues llamaes a formase, reciclase o emigrar.
ADEPAVAN defiende la idea de que "nun podemos salir xuntos d’esta situación,
una crisis que tien victimes y culpables. Resultaría incoherente navegar xuntos dos colectivos que remamos en diferente dirección: el de paraos y trabayadores, que defendemos el mantenimientu plenu de los nuestros derechos sociales, llaborales y salariales; y el de la patronal, que pretende mantener los sus ingresos a cualquier preciu".

Conceyu Abiertu tamién convoca una concentración de refuga

La organización soberanista Conceyu Abiertu por Llangréu tamién llama a refugar l’actu de la AJE y la Fundación Botín, por pretender, na so opinión "llavar la imaxe y la cara de la patronal, nel mesmu momentu que les comarques mineres algamen un record hestóricu na cifra de desemplegu. Los ayuntamientos de Llangréu y Samartín del Rei Aurelio, gobernaos pol PSOE, collaboren col eventu d’esta patronal cacique, agradecía enforma poles reformes llaborales del PPSOE, que-yos permite precarizar ainda más el trabayu, despedir xente d’una forma más cenciella y barata y nun respetar los drechos llaborales mínimos".