Absueltos los procesaos pola concentración antitaurina

La sentencia refuga que los dos mozos cometieran un delitu d’atentáu escontra l’autoridá, anque los multa por una falta d’alteración del orde públicu

23 de mayu de 2013 DE 2013 • Glayiu

Los dos procesaos pola concentración antitaurina d’agostu de 2012 en Xixón, pa los que la Fiscalía pidía penes de cárcel por atentáu escontra l’autoridá y lesiones a un axente policial a ún d’ellos, vienen de ser absueltos de los cargos más graves a los que facíen frente. La xueza del Xulgáu n.º 3 de Xixón atalanta que nun hubo atentáu escontra la Policía.

Elías F., que participaba na movilización pro derechos de los animales, y Pedro M., periodista de Diagonal Asturies, acaben de recibir la sentencia absolutoria de los cargos d’atentáu escontra l’autoridá polos que fueron xulgaos va una selmana. N’agostu de 2012 ambos taben na redolada de la plaza de toros de Xixón, onde aconceyó una baruyosa manifestación en defensa de los derechos de los animales y contra les corrides de toros. Nel ambiente electrizante que se dio, Elías F. foi prindáu y reducíu por dos axentes de la UIP del Cuerpu Nacional de Policía tras enllordiase nun rifirrafe con protaurinos. Una vez dientro del furgón, según testigos presenciales, Elías recibió presuntamente golpes a manos de los axentes de Policía, lo que prevocó les quexes de los manifestantes. Los axentes de la UIP que custodiaben el furgón respondieron apartando con agresividá a quienes velaben pola integridá del deteníu, ente ellos una fotógrafa de Diagonal Asturies. Nesi momentu Pedro M. apaeció interponiéndose ente la fotógrafa agredida y el xefe de subgrupu de la UIP que la taba acometiendo. De resultes, el periodista foi deteníu tamién y acusáu d’atentáu escontra l’autoridá y lesiones.

Nel xuiciu escontra ambos, cellebráu en dos sesiones, l’abogáu defensor de los procesaos, Adrián Álvarez, demostró que nun yera cierto que Elías F. se revolviera escontra los dos axentes que lu detienen, como quedó evidenciao na preba documental qu’apurrió al tribunal. Pela cueta, tamién quedó bien nidio que Pedro M. nun fizo presa sobre’l cuellu del policía que taba acometiendo a la fotógrafa de Diagonal Asturies, nin qu’empobinara con agresividá escontra’l funcionariu, tal y como aseguró l’axente, polo que tamién quedó absueltu del cargu d’atentáu escontra l’autoridá. Sí que mantién la xueza la falta de lesiones al axente, puesto que, en pallabres del tribunal, “nun se aprecia, sicasí, nin que garre al axente pol pescuezu faciendo presa nin que ufriere resistencia activa y grave ni que se revolviere escontra los axentes nel momentu de la entrada al furgón policial…”.

El Xulgáu sí qu’estimó que dambos alteraron l’orde públicu, polo que los fae responsables d’una multa de 180€, y nel casu de Pedro M., del pagu de 180€ amás al axente que lu redución, en vez de los 720€ que reclamaba l’axente, poles mancadures prevocaes na maniobra de detención.