A 142 años del tiempu de les zreces

18 de marzu de 2013 DE 2013 • Faustino Zapico

Tal día como güei, hai 142 años, los obreros y obreres d’un París asediáu poles tropes prusianes ficiéronse fuertes, xunto a la Guardia Nacional, proclamando el primer gobiernu obreru y popular. D’aquella esperiencia revolucionaria, colos sos errores y llimitaciones, encadarmóse tola teoría y la praxis anticapitalista de la que nos reclamamos: “¡Vive la Commune!”.

L’otru domingu 29 de mayu cumpliéronse 140 años de la fin de la Commune de París, la primer revolución obrera d’Europa, que llenó d’esperanza, o d’espantu, a la opinión pública del continente, y que contribuyó a forxar una identidá colectiva de la clase obrera, de la que’l republicanismu socialista foi un actor clave.

Francia, 1871. El suañu -o velea, sigún pa quien- del II Imperiu napoleónicu ta muertu depués de la humildante derrota francesa énte Prusia y los sos aliaos xermánicos. Napoleón III yá nun tien el poder, y el nuevu gobiernu provisional, presidíu por Adolphe Thiers, nun se sabe si ye monárquicu, republicanu o les dos coses. Depués d’un asediu de cuatro meses, Thiers dexa a los prusianos entrar en París, cola opinión contraria de la mayoría de la población capitalino, muncho más a la esquierda del nuevu gobiernu.

Los prusianos retírense, y tamién el gobiernu, que decide afitase en Versalles, nuna redolada menos hostil. París queda asina en manes de la Guardia Nacional, la milicia ciudadana. Cuando Thiers decide retira-yos los cañones que los parisinos mercaren por suscripción popular, el 18 de marzu de 1871, llevántense les primeres barricaes. Los soldaos niéguense a disparar a la xente y confraternicen colos obreros, incluyendo abondos oficiales. La revolución ta entamada.

El 26 de marzu celébrense elecciones a la Commune (Conceyu) de París, y gana un mecigayu de republicanos robespierranos, proudhonianos, socialistes blanquistes, y dellos marxistes y anarquistes de l’AIT. La estracción social, la clase obrera y la pequena burguesía de la capital: de 72 diputaos, 25 son obreros, 12 artesanos, otros 12 periodistes, 6 comerciantes, y dependientes, abogaos, mélicos, farmacéuticos, pintores o inxenieros. Cola alta burguesía escapada a Versalles, la Commune decreta, siguiendo’l guión de 1791, la espropiación de les fábriques abandonaes, que pasen a ser autoxestionaes polos obreros. Aprueba tamién la dixebra ente la Ilesia y l’Estáu, l’abolición de los intereses de les deldes qu’afueguen a les clases populares o la inembargabilidá de la vivienda, y ente otros elementos simbólicos, recupera’l calandariu republicanu, afita la bandera collorada como símbolu de la nueva república y baltia la columna Vendome, símbolu de les victories napoleóniques. El nuevu estáu vese a sigo mesmu como una federación democrática de conceyos. L’exemplu espárdese per Marsella, Lyon, Narbona, Toulouse… pero los soldaos del gobiernu de Thiers encárguense de reprimiles aína. La revolución tien de quedar aislada, afogada, pa ser achuquinada.

El 2 d’abril les tropes versalleses entamen la reconquista de la ciudá, entamando polos fuertes de la redolada. D’entós hasta la fin de la Commune, tolos esfuercios y toles midides van tar condicionaes pola necesidá urxente de tornar al enemigu. Nes barricaes combaten los obreros republicanos y socialistes nes sos diverses tendencies, pero tamién les obreres, nel so propiu batallón; tán los refuxaos políticos, sobremanera los polacos, qu’apurren un gran xefe militar, el xeneral Jaroslaw Dombrowski (que daría’l nome a la brigada internacional polaca na guerra civil española 65 años depués) y los garibaldinos italianos, que cunten col sofitu del so xefe dende Italia; y tamién los francmasones, depués de que fracasen los sos intentos de mediación.

La situación militar fáise tan revesosa que’l 28 d’abril decídese formar un Comité de Salú Público, como’l de 1793, qu’adopta midides estraordinaries y represives, que nun son a tornar la situación, pero que valdrán de sida pa xustificar la represión versallesa, infinitamente mayor. El 21 de mayu los soldaos gubernamentales entren por fín en Paris. Los combates yá son nes cais y nes places de la ciudá. Ye la llamada Selmana Sangrina, onde los versalleses van executando miles de communards de la que se rinden, amosando un rixu que nun tuvieren meses anantes nel campu de batalla escontra los prusianos. El 27 de mayu, como represalia, los defensores afusilen a 50 prisioneros, munchos d’ellos sacerdotes, ente ellos l’arzobispu de París, pero los versalleses maten munchos más, incluyendo a los xefes communards: Eugène Varlin ye lincháu por burgueses enraxonaos y depués afusiláu sentáu nuna silla porque nun se tenía en pie. El 28 de mayu cayen los caberos defensores na ciudá, nel cimenteriu de Père-Lachaise, que son afusilaos de secute y de diez en diez énte una muria que va pasar a la Historia como la Muria de los Federaos, símbolu d’ehí en delantre pa tola esquierda francesa. L’epígonu va ser al otru día, el 29, cola rendición del fuerte de Vincennes. Los fusilamientos, sumarios o depués de xuicios-farsa, siguieron dellos díis. Nun se sabe cuántes fueron les víctimes, pero tán ente 17.000 y 50.000. Munchos otros miles serín condergaos a llargues penes de prisión y/o deportaos a les colonies – solo a Nueva Caledonia, más de 7.000- onde morrerín bien d’ellos poles terribles condicones del cautiveriu. Per cinco años París taría baxo la llei marcial.

La prensa burguesa europea, nun exerciciu d’oxetividá d’esos a los que mos tien tan avezaos anguaño, recreóse na descripción, cuando non invención, de los escesos de la Commune, escaeciendo a costafecha qu’a manes de los federaos morrieren unes 1.000 persones, cuntando les muertes en combate, mientres que la cifra de víctimes de la represión versallesa yera mui superior. N’España, onde se vivía en plenu procesu revolucionariu dende 1868, el gobiernu quixo prohibir l’AIT, violando l’acabante d’aprobase Constitución de 1869, cola sida de que yera la responsable directa de la revolución parisina. Nun yera verdá, pero la so xera solidaria y propagandista de la mesma poníala nel puntu de mira de la burguesía, tanto lliberal como reaccionaria.

Fueron 72 díis onde la clase obrera tocó’l cielu coles manes, onde quedaben atrás les esperiencies revolucionaries de 1789, 1830 ó 1848, onde burgueses y proletarios tovía combatín nel mesmu llau de la barricada en nome de la democracia. D’ehí en delantre, la bandera de la democracia, del poder popular, quedaba únicamente en manes del pueblu trabayador.

Les llectures fueron diverses. Los anarquistes viéronla como’l modelu a siguir pol so calter descentralizáu y federativu. Los marxistes como l’exemplu d’estáu revolucionariu, sirviendo d’inspiración directa al Lenin de “L’Estáu y la Revolución”. Los republicanos federales, esos grandes escaecíos de la Historia peninsular, despachaos tan fácilmente polos historiadores posteriores venceyaos a les distintes corrientes del movimientu obreru como “republicanos pequenoburgueses”, siguieron celebrando toles primaveres la esperiencia de la Commune, como amuesa la prensa federal asturiana, que reseña los actos partidarios en Xixón onde se brindaba pola “República comunofederativa”.

Anque nun presta recordar derrotes, ye bono aprender d’elles, sobre too cuando la esquierda europea nes sos diferentes cañes ye en bona parte heriede de les corrientes que participaron na Commune. Porque nun lo escaezamos: toes elles taben presentes ellí, combatiendo xuntes por facer rialidá los principios de llibertá, igualdá y fraternidá.

P.S.: Un apunte pa finar, que ye la desplicación del títulu d’esti artículu. “El tiempu de les zreces” fo un poema de Jean Baptiste Clément, de 1866, musicáu dos años depués. El so autor féxolu pa falar d’un amor perdíu, y fai referencia al tiempu de les zreces, esto ye, la primavera. Como Clément foi diputáu de la Commune, y combatiente nes barricaes, esi cantar interpretóse años depués en clave revolucionaria por delles razones: por dedica-ylu el propiu autor a una enfermera muerta nes barricaes, y porque’l collorao de les zreces remitía tamién al de la sangre y la bandera de los federaos, asina como pol so tonu señaldosu que fai pensar na ocasión perdida.